Liboan ka tropang Amerikano ug ilang mga sakyanan ang midunggo sa nasud sa wala pa magsugod ang Balikatan. Dili moubos sa 400 ka sakyanang militar gikan sa hedkwarters sa Indo-Pacific Command sa US sa Hawaii ang gidiskarga sa dagkung barko sa Subic Bay niadtong Marso. Niadtong Abril 1, gipahigayon sa US ang mga maniobrang kombat sa kadagatan sa Pilipinas uban ang mga barkong iggugubat sa Australia ug Japan ug gagmayng barko sa Pilipinas. Sa misunod nga mga adlaw, gipanghinambog pa sa US ang mga unilateral nga live-fire exercises (pagpabusikad sa mga misayl), pagpalupad og mga jetfighter ug uban pang maniobrang militar sa kahanginan ug kadagatan sa nasud.

Kaniadto usang Abril 1, gisugdan ang 5-ka-adlaw nga tigum militar sa Camp Aguinaldo kung asa gipaambit sa AFP sa militar sa US ang sensitibo ug internal nga mga hisgutanang pangseguridad sa Pilipinas sa gitawag nga kinaunhang “Information Warfare Exercise.”

Dungan nga gisugdan ang tulo ka dagkung war games niadtong Abril 8: ang Cope Thunder sa mga airport sa Central ug Northern Luzon; MAREX 2024 sa Maguindanao del Norte; ug Salaknib 2024 sa Fort Magsaysay sa Nueva Ecija.

Sa mga unang pagpahigayon sa Balikatan niadtong dekada 1990, usa kini ka bilateral o duha ka bahin nga “pagbansay militar” para sa “inter-operability” o pagsumpay sa armadong hukbo sa US ug itoy nga AFP. Apan sukad nga “mipaling” ang US sa Asia, giabli kini sa US, bisan ang soberanong teritoryo sa Pilipinas, sa ubang langyawng tropa. Sa umalabot nga Balikatan, 14 ka nasud (Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand ug Vietnam) ang mosalmot ug mag-obserba sa pakitang-gilas sa US.

Sa ingon, nagsilbi usab nga usa ka dakung pasundayag sa mga armas ang Balikatan ug uban pang wargames sa US kung asa ginapakita niini ang mga armas nga hinimo sa monopolyong mga Amerikanong kumpanyang militar. Karong tuiga, gihimo sa US nga kabahin sa Balikatan ang operasyon sa ginabaligya niining missile defense system gikan sa Israel.