Subsub ang paningkamot sa mga sanga ug komite sa Partido Komunista ng Pilipinas (PKP), mga yunit sa Bagong Hukbong Bayan (BHB) ug tibuok rebolusyonaryong kalihukan sa Masbate aron ipatuman ang kalihukang pagtul-id nga gipanawagan sa Komite Sentral niadtong Disyembre 2023. Gibwelo nila ang mga pag-ases ug pagtuon sugod niadtong unang kwarto sa tuig.

Kalihukang pagtuon

Isip pasiunang lakang, naglunsad og lain-laing mga tigum konsolidasyon ug pagtuon ang BHB ug masa alang sa pagsaulog sa ika-55 nga anibersaryo sa Partido ug BHB. Nanghatag usab sila og mga polyeto ug nangbutang og mokabat sa 1,000 ka mga istrimer sa daghang bahin sa prubinsya. Gigamit kining higayon aron ipaambit sa masa ug mga kauban ang panawagan alang sa kalihukang pagtul-id.

Sa taho sa mga natarang gerilya, nakalunsad og walo ka batch sa kulturanhong programa o pulong masa sa anibersaryo sa Partido ug Hukbo nga gisalmutan sa kapinkun-kulang 300 katawo. Gipresenta ang lain-laing kulturanhong pasundayag sama sa awit, sayaw ug drama nga nagsubay sa kasaysayan sa rebolusyonaryong kalihukan sa prubinsya.

Gihimo ang mga pagtuon sa pamahayag sa Komite Sentral sa ika-55 nga anibersaryo sa Partido sa lain-laing mga sanga sa Partido sa lokalidad, organisasyong masa ug yunit sa Hukbo. Pipila ka mga komite sa nataran na usab ang nakatuon sa pamahayag sa Partido sa ika-55 anibersaryo sa BHB. Gidungan dinhi ang mga kampanya sa subling pagpanumpa sa mga sanga sa Partido. Nagtuon-balik na usab ang mga yunit ug komite sa Batakang Balaod sa Partido.

Gawas dinhi, naglunsad og mga tigum asesment ang mga komite sa Partido sa lain-laing ang-ang aron malakip sa tagsa-tagsa nilang mga programa ug plano sa paglihok ang kalihukang pagtul-id. Gidungan sa maong mga pulong ang pagtuon sa mahinungdanong dokumentong nagsumada sa kasinatian sa Partido sa milabayng mga tuig ug uban pang dokumentong mahinungdanon sa kasinatian sa prubinsya.

Samtang sa usa ka nataran, napahigayon karong kwarto ang usa ka batch sa pagtuon sa Batakang Kurso sa Partido.

Pag-ila sa mga kasaypanan ug pagtul-id

Subay sa panawagan sa Komite Sentral, kinasingkasing nga giila sa lain-laing komite sa Partido sa prubinsya ang mga nahimong kasaypanan sa kalihukan sa pagpangulo sa rebolusyonaryong pakigbisog sa mga Masbatenyo. Matinud-anon nga gi-ases sa matag komite ug matag kumand sa Hukbo ang mga internal nga kahuyangan sa lain-laing natad sa gimbuhaton.

Gigambalay nila ang mga pasiunang pagsumada sa rebolusyonaryong gimbuhaton. Gisugdan na usab ang mga paningkamot sa kampanya sa kumprehensibong katilingbanong pagtuki ug pakisusi sa hut-ong.

Ginatul-id usab sa mga yunit sa hukbong bayan ang iya-iyang manera sa paglihok sa mga nataran. Tumong niining molikay sa wala gikinahanglan ug depensibang mga panagsangka. Gisugdan na usab sa mga yunit sa prubinsya ang pagpalapad sa mga eryang wala nila naabot kanhi. Sa mga lugar nga dugay nang wala nabalikan sa hukbong bayan, inanay nga subling gipabati sa mga kauban ang ilang presensya ngadto sa masa.

Sa isla sa Ticao, nahimong kabahin sa gimbuhaton sa Pulang hukbo ang pagtabang sa masa sa produksyon. Gikalipay sa masa nga miabag ang hukbong bayan sa ilang mga gimbuhaton sa pagkopra.

Hagit karon sa rebolusyonaryong kalihukan sa prubinsya nga pakusgon ang armadong pagsukol aron mapakusog ang Hukbo ug ang kalihukang masa. Nanawagan ang komite sa Partido sa tanang yunit sa Hukbo nga maglunsad og sustenidong mga taktikal nga opensiba aron pahuyangon ug hingpit nga pakyason ang paghari sa teror sa mga armadong pwersa sa rehimeng US-Marcos.

Partikular usab nga gihatagag duut sa komite ang pagulunsad og mga anti-pyudal nga pakigbisog ug mga kampanya para sa paninabuhian isip pundasyon sa pagpakusog sa kalihukang masa sa Masbate.

Nahimugso ang rebolusyonaryong kalihukan sa Masbate niadtong 1983 dihang miabot dinhi ang tulo ka kauban nga armado lamang sa duha ka ubos nga klaseng riple. Sa milabayng pipila ka dekada, napamatud-an sa masang Masbatenyo nga tinuod nilang masaligan ang hukbong bayan ug kaabin nila sa pagbawi sa ilang mga yuta ug pagdepensa sa ilang demokratikong mga katungod.