Welgang transportasyon, nagmalampuson. Naglunsad og welgang transportasyon niadtong April 15-16 ang PISTON ug Manibela aron iduso ang pag-atras sa pugos nga konsolidasyon sa prangkisa sa umalabot nga Abril 30 ug ibalik ang 5-ka-tuig nga indibidwal nga prangkisa. Anaa sa 80% sa mayor nga mga ruta sa Metro Manila ang naapektuhan ug pipila ka bahin sa Cavite ug Laguna ang naparalisa. Sa unang adlaw, mikabat sa 400 ka dyip ang misalmot sa protesta ug karaban padulong sa LTFRB, kung asa sila nagpagabii. Pagkaugma, nagkomboy ang mga drayber ug opereytor padulong sa Welcome Rotonda sa utlanan sa Quezon City ug Maynila.

Aduna usay susamang mga welgang pang-transportasyon sa Iloilo, Bacolod ug Cebu, ug lihok-protesta sa Davao. Ang maong aktibidad kabahin sa serye sa mga protesta nga planong ipahigayon sa duha ka grupo sa transportasyon hangtud sa katapusan sa bulan.

Pagbungkag sa NTF-Elcac, subling gipanawagan. Nagprotesta ang mga myembro sa KMP ug uban pang grupong mag-uuma atubangan sa National Intelligence Coordinating Agency sa Quezon City niadtong Abril 12 aron kundenahon ang paglakip sa NTF-Elcac sa KMP sa 30 ka organisasyon nga giakusahang “prente” sa Partido ug BHB. Matud nila, ang maong Red-tagging kabahin sa pagpagrabe sa pagpamig-ot sa rehimeng Marcos batok sa mga ligal ug lehitimong organisasyong masa, subay sa operasyong kontra-insurhensiya niini nga nakagambalay sa giya sa US.

Protestang Red Friday (Pulang Biyernes) alang sa sahod, gilunsad. Gilunsad sa mga mamumuo ang unang Red Friday Protest alang sa dugang suhulan ug batok sa maki-negosyo ug makilangyaw nga PUVMP niadtong Abril 12 sa Marikina City ug sa Monumento, Caloocan niadtong Abril 19. Gikundena nila si Ferdinand Marcos Jr na daw kanunay nagayawyaw sa chacha (charter change) apan padayon nga nagpakahilum sa isyu sa suhulan. Ilang giduso nga tinuyong gamay kaayo, ug ulahi pa, ang ginahatag sa mga regional wage board niadtong milabayng tuig.