Pursigido ang pagtinguha sang mga sanga kag komite sang Partido Komunista sang Pilipinas (PKP), mga yunit sang Bagong Hukbong Bayan (BHB) kag bug-os nga rebolusyonaryo nga kahublagan sa Masbate para ipatuman ang kahublagan panadlong nga ginpanawagan sang Komite Sentral sadtong Disyembre 2023. Ginbwelo nila ang mga pagtasa kag pagtuon sugod sadtong una nga kwarto sang tuig.

Kahublagan pagtuon

Bilang panugod nga tikang, naghiwat sang lain-lain nga mga pulong konsolidasyon kag pagtuon ang BHB kag masa para sa kahiwatan sang ika-55 nga anibersaryo sang Partido kag BHB. Nagpanagtag man sila sang mga polyeto kag nagpangtapik sang malab-ot sa 1,000 ka mga istrimer sa madamo nga bahin sang probinsya. Gingamit ini nga higayon para ipaambit sa masa kag mga kaupod ang panawagan para sa kahublagan panadlong. Sa report sang mga larangan gerilya, nakalunsar sang walo ka hugna sang gin-isa nga programa pang-kultura ukon pulong masa sa anibersaryo sang Partido kag Hukbo nga gintambungan sang mas o menos 300 ka pumuluyo. Ginpasundayag ang lain-lain nga kulturang pasundayag pareho sang kanta, saot kag binalaybay nga nagasaysay sang kasaysayan sang rebolusyonaryong kahublagan sa probinsya.

Ginhiwat ang mga pagtuon sa pahayag sang Komite Sentral sa ika-55 nga anibersaryo sang Partido sa lain-lain nga mga sanga sang Partido sa lokalidad, organisasyon masa kag yunit sang Hukbo. Pila ka mga komite sa larangan man ang nakatuon sa pahayag sang Partido sa ika-55 nga anibersaryo sang BHB. Gindungan diri ang mga kampanya sa liwat nga pagsumpa sang mga sanga sang Partido. Nagbalik-tuon man ang mga yunit kag komite sang Partido sa Konstitusyon.

Magluwas diri, naglunsar sang mga pulong pagtasa ang mga komite sang Partido sa lain-lain nga lebel para maupod sa ila matag programa kag plano sang paghulag ang kahublagan panadlong. Gindungan sa mga pulong nga ini ang pagtuon sang malahalon nga dokumento nga nagasuma sa inagihan sang Partido sang nagligad nga mga tinuig kag iban pa nga dokumento nga may importansya sa inagihan sang probinsya.

Samtang sa isa ka larangan, ginlunsar subong nga kwarto ang isa ka hugna sang pagtuon sang Sandigan nga Kurso sang Partido.

Pagtumod sa mga kasaypanan kag pagpanadlong

Santo sa panawagan sang Komite Sentral, bug-os taguipusoon nga gintumod sang lain-lain nga komite sang Partido sa probinsya ang mga nangin pagkulang sang kahublagan sa pagpamuno sa rebolusyonaryong paghimakas sang mga Masbatenyo. Tampad nga gintasa sang matag komite kag matag kumand sang Hukbo ang mga internal nga kahuyangan sa lain-lain nga patag sang hilikuton. Ginbalay nila ang mga panugod nga pagsuma sang rebolusyonaryong hilikuton. Ginsugdan man ang mga pagtinguha sa kampanya sang kumprehensibo nga sosyal nga imbestigasyon kag pag-analisa sa sahi.

Gintadlong man sang mga yunit sang hukbo sang banwa ang ila matag pamaagi sa paghulag sa mga larangan. Katuyuan sini nga maglikaw sa indi kinahanglanon kag depensiba nga awayan. Ginsugdan man sang mga yunit sa probinsya ang pagpalapad sa mga erya nga wala nila nagligad malab-ot. Sa mga lugar nga madugay nga wala nabalikan sang hukbo sang banwa, hinay-hinay nga ginpabatyag liwat sang mga kaupod ang ila presensya sa masa.

Sa isla sang Ticao, nangin bahin sang taktika sang Pulang hukbo ang sikreto nga pagbulig sa masa sa produksyon bilang ila suporta. Ginkalipay sang masa nga may nagatapos na sa ila mga hilikuton sa pag-kopra.

Panghangkat subong sa rebolusyonaryong kahublagan sa probinsya nga pabaskugon ang armadong pakig-away para mapabaskog ang Hukbo kag ang kahublagan masa. Nagapanawagan ang komite sang Partido sa tanan nga yunit sang Hukbo nga maglunsar sang sustenidado nga mga taktikal nga opensiba para pahuyangon kag lubos nga paslawon ang paghari sang kakugmat sang mga pwersa sang rehimen US-Marcos.

Partikular man nga gintum-okan sang komite ang paglunsar sang mga paghimakas kontra-pyudal kag mga kampanya para sa palangabuhian bilang tungtungan sa pagpabaskog sang kahublagan masa sang Masbatenyo.

Nabun-ag ang rebolusyonaryong kahublagan sa Masbate sadtong 1983 sang naghugpa diri ang tatlo ka kaupod nga armado lang sang duha ka imperyor nga klase sang riple. Sa nakaligad nga pila ka dekada, napamatud-an sang masang Masbatenyo nga matuod nila nga masaligan ang hukbo sang banwa kag kaupod nila sa pagbawi sang ila mga duta kag pagpangapin sa ila demokratikong kinamatarung.