Linibo ka tropang Amerikano kag ila salakyan ang nagdungka sa pungsod antes pa magsugod ang Balikatan. Indi magnubo sa 400 ka salakyan militar halin sa hedkwarters sang Indo-Pacific Command sang US sa Hawaii ang gin-diskarga sang dalagko nga barko sa Subic Bay sadtong Marso. Sadtong Abril 1, ginpatigayon sang US ang mga maniobra pang-kombat sa kadagatan sang Pilipinas upod ang mga barko pang-gyera sang Australia kag Hapon kag gagmay nga barko sang Pilipinas. Sang sunod nga mga inadlaw, ginpadayaw pa sang US ang mga unilateral nga live-fire exercise (pagpalupok sang misayl), pagpalupad sang mga jet fighter kag iban pa nga maniobra militar sa sulod sang kahawaan kag kadagatan sang pungsod.

Sadto man sang Abril 1, ginsugdan ang 5-adlaw nga pagsinapol militar sa Camp Aguinaldo kon diin ginpaambit sang AFP sa militar sang US ang sensitibo kag internal nga mga hambalanon pang-seguridad sang Pilipinas sa ginatawag nga pinaka-una nga “Information Warfare Exercise.”

Dungan nga ginbuksan ang tatlo ka dalagko nga war games sadtong Abril 8: ang Cope Thunder sa mga paluparan sa Central kag Northern Luzon; MAREX 2024 sa Maguindanao del Norte; kag Salaknib 2024 sa Fort Magsaysay sa Nueva Ecija.

Sa una nga paglunsar sang Balikatan sadtong dekada 1990, isa ini ka bilateral ukon duha ka bahin nga “paghanas militar” para sa “inter-operability” ukon pagsugpunanay sang armadong hukbo sang US kag papet nga AFP. Apang halin sang “nagliso” ang US sa Asya, ginbukas ini sang US, kag ang soberano nga teritoryo sang Pilipinas, sa iban pa nga dumuluong nga tropa. Sa maabot nga Balikatan, 14 ka iban nga pungsod (Brunei, Canada, France, Germany, Great Britain, India, Indonesia, Japan, Malaysia, New Zealand, Republic of Korea, Singapore, Thailand kag Vietnam) ang magapakigbahin kag maga-obserbar sa patikal-tikal sang US.

Gani, magaserbe man nga isa ka dako nga palagwaon sang mga armas ang Balikatan kag iban pa nga war games sang US kon diin ipasundayag sini ang mga hingahiban nga himo sang monopolyo nga mga Amerikano nga kumpanyang militar. Subong nga tuig, ginhimo sang US nga bahin sang Balikatan ang operasyon sang ginabaligya sini nga himo sa Israel nga missile defense system.