Sardeng-pasada iti UP-Diliman. Nagsardeng-pasada dagiti drayber ken opereytor ti dyip nga agbibyahe iti uneg ti UP-Diliman idi Agosto 1 tapno supyaten ti panagserrek iti kooperatiba ti e-jeepney nga umagaw iti ruta dagiti tradisyunal a dyip iti kampus. Ti tignay ket inyuna ti UP Transport Group, iti suporta dagiti estudyante, manursuro ken dagiti mangmangged ken empleyado ti unibersidad. Nagisumite met ti grupo ti surat iti administrasyon ti UP-Diliman. Linaon daytoy ti innem a kadawatan dagiti drayber.

Panagsabat iti umuna nga aldaw ti klase. Nagprotesta idiay Mendiola iti Manila dagiti manursuro a kameng ti ACT-Philippines idi Hulyo 29, kagiddan ti panaglukat ti klase. Binabalaw da ti panagbaybay-a ti rehimen Marcos ken dagiti palpak a patakaran daytoy iti edukasyon. Kunada, napaay ti rehimen Marcos a sungbatan ti agnanayon a kinakurang dagiti klasrum, manursuro, dagiti tauhan a pangsuporta iti sektor ti edukasyon, us-usar iti panagisuro ken dagiti pasilidad.

Dagiti biktima ti bagyo a Carina, nagpiket. Agsasaruno a piket-protesta ti insayangkat dagiti nakurapay iti syudad ken grupo a maka-kalikasan idi Hulyo 29 iti upisina ti Department of Social Welfare ken Department of Environment and Natural Resources iti Metro Manila. Singsingiren da ti rehimen Marcos ken dagiti ahensya daytoy iti panagbaybay-a ken sungsungbatan da kadagiti nadalapus ti bagyo a Carina.