Pagsungsungbaten dagiti grupo a maka-kalikasan ti San Miguel Corporation ken ti rehimen Marcos iti napasamak nga oil spill (naibelleng a langis) manipud iti limned a barko nga MT Terra Nova iti Manila Bay. Kunada, rumbeng nga agsungbat dagitoy iti perdi nga intunda ti naibelleng a langis iti pagbiagan ti komunidad, sistema ti ekolohiya ken salun-at ti umili.

Ti MT Terra Nova ket barko a kinontrata ti Petron Corporation, kumpanya a tagikua ti San Miguel Corporation, tapno agitulod ti 1.4 milyon a litro ti pang-industriya a langis iti isla ti Panay. Pinalubosan daytoy ti Philippine Coast Guard nga aglayag iti laksid ti nadawel a panawen. Limned daytoy mano a kilometro manipud iti baybay ti Limay, Bataan idi Hulyo 25 ken nangrugi a nagubo ti langis dua nga aldaw kalpasan daytoy.

Maikadwa daytoyen a dakkel nga oil spill iti sidong ti rehimen Marcos. Idi napan a tawen, limned asideg iti Lubang, Oriental Mindoro ti MT Princess Empress ken naibelleng ti karga daytoy nga 800,000 litro a langis a kinontrata nga ipadeliber ti Petron. Agingga ita, ag-agalen pay laeng ti agarup 25,000 mangngalap ti dadael nga intunda daytoy iti kabaybayan ti Oriental Mindoro ken kadagiti kaabay na a prubinsya. Karaman met ti Petron iti oil spill iti Cavite idi 2013 (500,000 litro) ken ti kakaruan nga oil spill iti Guimaras (2.1 milyon a litro) idi 2006.

Napeggad iti salun-at ti tao ti langis a kadawyan nga agub-ubo kadagiti barko. Aglalaon dagitoy kadagiti makasabidong a kemikal kas ti mercury, arsenic ken lead. Dagitoy ket mabalin nga agitunda ti panaggagatel iti kudil, iritasyon iti pananganges ken kanser. Dakkel met ti epekto daytoy iti law-ang ken dagiti dadduma pay a nabiag iti kabaybayan. Iti pangmabayagan, apektaran dagitoy a kemikal ti reproduksyon dagiti ikan a mangitennag iti makalapan dagiti mangngalap uray awanen ti oil spill.

Nu agwaras nga usto ti naibelleng a langis iti Manila Bay, maapektaran ti pagbiagan ti saan a bumaba iti 29,000 a mangngalap iti Cavite laeng. Mabalin met a dumanon iti ₱351 milyon ti gatad ti danyos iti pagbiagan ti 46,000 a mangngalap iti Central Luzon, Region 4A ken National Capital Region. Agpegpeggad a perdien ti oil spill dagiti bakawan, ruruot ti kabaybayan, korales ken dagiti pupukan.