Napadisi ti umili A Bangladesh ti prime minister ti pagilyan a ni Sheik Hasina Wazed idi kalman, Agosto 5, iti tengnga dagiti higante a protesta laban iti panagari na. Napadisi isuna maysa nga aldaw kalpasan a mapasamak ti kadadaraan a protesta iti pagilyan, nu sadinno a pinatuduan ti bala dagiti pulis ti rinibo a raliyista. Dagus a napatay ti nasurok 90 ken ginasut ti nasugatan ditoy nga aldaw.

Nangrugi dagiti protesta iti uneg dagiti unibersidad laban iti sistema a kota iti panangited kadagiti trabaho iti burukrasya a sibil. Napaspas a simmaknap ti panaglaban kalpasan a paulit-ulit a rauten dagiti pwersa ni Hasina dagiti demonstrasyon. Nagipatungpal ni Hasina ti karpyu, pinuted na ti internet, inpaserra na dagiti unibersidad ken ti midya. Iti kinakaro ti kinarungsot dagiti pulis, dimmanon ti panawagan iti panagbaba ni Hasina. Iti kabuklan, nasurok 300 ti napatayen kadagiti protesta nga immuna a bimtak idi Hunyo.

Adda iti sentro dagiti protesta dagiti estudyante ken umili a Bangladesh ti nakaro a krisis iti ekonomya, ken ti kinaawan ti trabaho ken oportunidad iti pagilyan. Ti kaykaysuna a nasayaat a trabaho iti pagilyan, nangruna kadagiti nakaturpos iti kolehiyo, ket dagiti pwesto iti gubyerno. Gapu iti sistema a kota, nagbalin a limitado dagitoy a pusisyon. Binaliwanen ti Korte Suprema daytoy a sistema idi maikadwa a lawas ti Hulyo.