Balligi a naangay idiay Venezuela ti presidensyal nga eleksyon idi Hulyo 28. Nangabak ditoy ti nakatugaw a presidente a ni Nicolas Maduro, maysa kadagiti natibker nga anti-imperyalista a mangidaulo iti Latin America. Nakaala isuna ti 51.2% iti botos, laban iti kalaban na a ni Edmundo Gonzales Urrutia, a nakaala ti 44.2%.

Ginandat ti US ken dagiti alyado na iti Latin America a riribuken ti eleksyon babaen ti panang-hack iti data transmission system a nagresulta iti pannakaitantan ti panangiruar ti resulta ti panagbibilang. Idi saan a nagballigi, indeklara daytoy a “nasaur” ti eleksyon ken nabigbig ni Urrutia a “nangabak” uray awan ti iggem nga ebidensya a panagsaur.

Ni Urrutia ket pangsukat a kandidato ti oposisyon a ni Maria Corina Machado, a napawilan a tumaray gapu iti panagsuporta na iti US iti panangipataw dagiti sangsyon a pang-ekonomya a mangparparigat iti Venezuela, ken iti panagpanawagan para iti gangannaet nga interbensyon a militar tapno padisien ni Maduro.