Simrek iti “hypermode” wenno nair-irteng a tukad ti pannakibiang ti imperyalista a US iti Asia idi Hulyo. Manipud Hulyo 25, innem a pagilyan iti Asia ti rinikus na iti 10 nga aldaw ni State Sec. Antony Blinken (sekretaryo iti relasyon a pangruar). Bimmisita ken nakimiting ni Blinken iti Vietnam, Laos, Japan, Pilipinas, Singapore ken Mongolia. Segun iti mismo a pablaak ti US, panggep daytoy nga idanun kadagiti “alyado” ti US nga agtaltalinaed a “nabalkot iti landok” ti komitment daytoy iti rehiyon iti maudi nga innem a bulan ti administrasyon ni Pres. Joseph Biden. Naikeddengen a bumaba ni Biden kalpasan ti eleksyon iti US inton Nobyembre.

Iti Japan ken Pilipinas, kabinnadang ni Blinken ni Defense Sec. Lloyd Austin iti naawagan a 2+2 a panagmiting kadagiti kabatog da a ministro.

Iti Japan, induron ti US ti panangpalobo ti pangmilitar a badyet na iti “istorikal a tukad” pangmilitar tapno ingato ti militar a kabaelan na laban iti komun a karibal da a China. Karaman ditoy ti panangpadur-as ti Japan kadagiti armas nukleyar iti linged ti “nuclear deterrence” (pananglapped ti posibilidad ti maysa a nukleyar a gera). Pinapigsa met ti US ti maaw-awagan a US Forces Japan idiay Tokyo, a sentro a kumand ti militar ti US a mangimatmaton iti saan a bumaba iti 120 aktibo a base militar ti US iti pagilyan. Nasurok 55,000 tropa nga Amerikano ti permanente a nakabase iti Japan.

Simmangpet iti Pilipinas ni Blinken idi Hulyo 9 para kadagiti diplomatiko ken pangseguridad a pulong. Maikatlo daytoyen a panagbisita na iti pagilyan iti napalabas a dua a tawen. Idi Hulyo 30, iti umuna a gundaway, naangay ditoy Pilipinas ti 2+2 a pulong, a manipud rugi idi 2012 ket iti US a kanayon a maang-angay. Pinulong da Blinken ken Austin da Enrique Manalo, sekretaryo ti Department of Foreign Affairs ken Gilberto Teodoro, sekretaryo ti Department of National Defense ti Pilipinas. Sakbay daytoy, pinulong ti dua nga upisyal ti US ni Ferdinand Marcos idiay Malacañang idi Hulyo 29.

Natalantan iti nasao a pulong ti plano para iti panangbukel ti General Security of Military Information Agreement. Launen ti nasao a katulagan ti pammarang a “panagbibinningay” kadagiti sensitibo nga impormasyon militar iti baet ti dua a pagilyan. Nalabit a maysa manen daytoy a saan a patas a katulagan militar iti baet ti US ken Pilipinas, a sumakop laeng iti “sensitibo nga impormasyon” manipud iti Pilipinas. Aramiden na laeng daytoy a pormal ti nabayagen a pannakibiang ti US kadagiti internal a saritaan nga addaan kainaigan na iti nailyan a seguridad ti Pilipinas.

Ditoy met nga inyanunsyo ni Austin ti panangited ti US ti $500 milyon nga ayuda a militar (wenno foreign military financing) iti Pilipinas. Daytoy a gatad ket 12 daras a dakdakkel kumpara iti $40 milyon a kadawyan a tinawen nga ayuda a militar ti US iti Pilipinas. Maaramat daytoy iti “panaggatang” kadagiti nagpalusan nga armas ken lugan a panggubat, a kayat nga igabsuon ti US iti pagilyan iti linged ti “modernisasyon” ti AFP. Gagem daytoy nga ad-adda pay nga igalut ti Pilipinas iti heyopulitikal nga estratehiya na ken aramaten ti pagilyan a pangisayangkatan ti isagsagana na a gera iti rehiyon. Malaksid ditoy, inyanunsyo met ni Austin a mangilatang daytoy ti $128 milyon iti maiyaramid a konstruksyon ti saan a bumaba iti siyam a base militar iti sidong ti EDCA a para iti eksklusibo nga usar dagiti tropa nga Amerikano.

Ti balbaliw a panagbisita da Blinken ken Austin iti Pilipinas ket sinabat dagiti protesta. Nagturong iti Camp Aguinaldo ti nadumaduma a nailian-demokratiko a grupo idi Hulyo 30 tapno babalawen ti rehimen Marcos iti panangpastrek iti pagilyan ti dua a kriminal iti gubat. Kunada, responsable dagitoy a dua iti panangsugsog ti gera iti nadumaduma a paset ti intero a lubong, ken iti panangiduron iti henosidyo iti Palestine.

Binabalaw da met ni Marcos iti panaglimlimos ken panagkurno na iti dua nga imperyalista nga ahente, panangipalubos iti presensya dagiti gangannaet a tropa ken panangisuko iti soberanya ti pagilyan iti umad-ado nga “EDCA site” ken dagiti war games a mangperperdi iti pagbiagan ti umili. Idi Hulyo 31, nagiyaramid met ti rali nga apagdarikmat (lightning rally) dagiti agtutubo iti sango ti embahada ti US.

Idiay Japan, napasamak met ti kapada a protesta idi Hulyo 28 kagiddan ti US-Japan 2+2 ministerial meet idiay Tokyo. Panawagan dagiti aktibista agpada iti Japan ken Pilipinas ket “Blinken ken Austin, not welcome!”