Agtultuloy nga ipagpaganetget dagiti drayber ken opereytor ti panangibasura iti Public Utility Vehicle Modernization Program (PUMVP) a mangidurduron iti jeepney phaseout ken panangsukat kadagitoy kadagiti nangina ken nagpalusan nga imported a mini-bus. Daytoy ket kalpasan nga ideklara ti Department of Transportation (DOTr) nga agtuloy ti PUMVP iti laksid ti maikadwa a resolusyon ti senado tapno ipasuspindi ti programa.

Inikkan atensyon ti senado a dakkel a bilang dagiti dyip ti nagkedked nga agkonsolida, gapu iti kinaawan-kabaelan dagiti drayber ken opereytor a gumatang ti nakanginngina a mini-bus.

Masuspindi man wenno saan ti PUMVP, dakkelen ti inpaay daytoy a pukaw iti pagbiagan dagiti drayber ken opereytor. Ginandat daytoy a lapdan ti dakkel a bilang dagiti dyip nga agpasada iti pangta a maharang dagiti saan a konsolidado a dyip, makasuan dagiti drayber ken maala (impound) dagiti dyip.

Daytoy ket iti laksid ti saan a naisapubliko a resolusyon ti LTFRB idi Abril 30 a nangipalubos kadagiti saan a konsolidado a dyip nga agpasada kadagiti ruta nga awan wenno nababa ti konsolidado a prangkisa. Ginagara nga inlimed daytoy ti LTFRB kadagiti drayber ken opereytor tapno pwersaen ti dakkel pay a bilang dagiti drayber a saan a nagpakonsolida nga agpauneg iti PUMVP.

Ti programa ket padagsen uray kadagiti nagkonsolida ken napwersa a gumatang ti nangina a lugan a narukop ken narigat nga ibirukan ti pyesa. Idiay Iloilo City, ti PUMVP ket nagibunga iti panagkissay ti adu a ruta ti babassit a kooperatiba ken panagmonopolisa ti dadakkel a korporasyon kadagiti mayor a ruta iti uneg ti syudad.

Agtultuloy ti panawagan ti Piston para iti panagsubli iti 5-tawen nga indibidwal a prangkisa ken panagsanud dagiti napwersa a drayber iti aplikasyon da para iti konsolidasyon.