Padayong miburot ang gigahin nga badyet ni Marcos alang sa iyang instrumento sa terorismo sa estado. Sa gisugyot nga badyet ni Marcos para sa 2025, salawayon kaayo ang planong 51% nga dugang sa kibatibuk-ang badyet alang sa militar, gikan sa ₱278.1 bilyon karong 2024 ngadto sa ₱419.3 bilyon sa 2025. Dakung bahin niini mopaingon sa Armed Forces of the Philippines nga makadawat og ₱242.8 bilyon.

Halos tanang sanga sa AFP makadawat og dugang-badyet sa 2025, pinakadaku ang sa Philippine Navy, nga misaka ngadto sa ₱49 bilyon gikan ₱41.4 bilyon. Ingon niini usab alang sa Philippine Army nga modawat og dugang ₱1.8 bilyon, ug Philippine Air Force, nga modawat og dugang ₱4.6 bilyon.

Daku usab ang mahimong pag-usbaw sa pondo sa Revised AFP Modernization Program (RAFPMP), nga gilaumang makadawat og 25% nga dugang-badyet, gikan sa ₱40 bilyon ngadto sa ₱50 bilyon. West Philippine Sea ang ginahimong rason alang sa giingong pag-usbaw. Sa RAFPMP ginakuha sa militar ang pangpalit sa lain-laing armas nga ginagamit niini sa pagsabwag og terorismo sa kabukiran, sama sa pagpalit sa pila ka bats sa Elbit drone system sa Israel, attack helicopter, mga barkong iggugubat, ug mga radar system sa milabayng mga tuig. Plano sa AFP nga mopalit og mga bag-ong FA-50PH light jet fighters gikan sa South Korea gamit ang pondo sa 2025.

Sa magubatong barog niini sa West Philippine Sea, pagabubuan usab og pondo ang Philippine Coast Guard nga makadawat sa ₱31.3 bilyon, nga gamiton kuno alang sa pagpatukod og ospital (₱386 milyon), pagpatukod sa West ug South Navigational Tele Project (₱452 milyon), ug Radar for Cebu Vessel Traffic Management System (₱37 milyon).

Nahisukip sa liboan ka palid sa badyet sa reaksyunaryong gubyerno ang plano niini alang sa tinuig nga pagpalit og 120,000 ka set sa uniporme sa mga sundalo ug halos 110,000 ka set sa combat boots gikan 2025 hangtud 2029, nga adunay kinatibuk-ang kantidad nga ₱3.77 bilyon.

Samtang, daku usab ang pagsaka sa badyet sa Philippine National Police (PNP), nga modako gikan sa kasamtangang ₱198.3 bilyon nga badyet ngadto sa ₱206.2 bilyon. Adunay gigahin nga ₱581 milyon aron magrekrut og 2,000 bag-ong pulis. Naggahin usab og ₱450 milyon aron magtukod og dugang nga 37 istasyon sa pulis sa nasud.

Dili usab magpaulahi ang National Task Force to End Local Communist Armed Conflict (NTF-ELCAC) nga gigahinan og ₱7.8 bilyon alang sa Barangay Development Program niini, nga dugay nang nabisto nga porma sa pork barrel sa mga heneral.

Adunay ₱4 bilyon nga badyet usab sa mosunod nga tuig ang Philippine Drug Enforcement Agency alang sa pagpadayon sa maduguong drug war.

Padayon gihapon nga ginagahinan ang confidential and intelligence funds (CIF), nga adunay kinatibuk-ang ₱10.3 bilyong badyet. Moabot sa ₱5.9 bilyon niini ang alang sa intelligence funds, o pondo sa paniktik alang sa mga unipormadong ahensya, ug ₱4.4 bilyon usab alang sa confidential funds, nga pondo sa paniktik alang sa mga sibilyan nga ahensya. Gipasigarbo ni Marcos nga mas gamay ang badyet sa CIF tungod kay gitangtang ang badyet alang dinhi sa pipila ka ahensya sama sa Office of the Vice President.

Ingonman, walay kasayuran ang publiko kung paunsa gigasto sa reaksyunaryong gubyerno ang CIF. Sa sugyot balaodnon niadtong 2024, ₱5.3 bilyon lang ang gigahin alang sa intelligence funds, pero sa dihang nahimong balaod, kalit ra kining nadugangan og ₱2.9 bilyon ngadto sa ₱8.3 bilyon.

Samtang miburot ang pondo sa militar ug pulis, nag-atubang usab sa dinagkung pagkibhang ang mga ahensya sa reaksyunaryong gubyerno alang sa serbisyo, lakip na ang Department of Health nga may ₱23.4 bilyon nga pagkibhang,

Usa sa pinakadakung kibhangan mao ang pondo alang sa kabus nga pasyente alang sa ilang gasto sa ospital (₱31.2 bilyon).