Gipasidunggan ug giila sa Partido Komunista ng Pilipinas, Bagong Hukbong Bayan (BHB), ug sa tibuok rebolusyonaryong kalihukan ug masa ang 10 ka kadre sa Partido ug Pulang hukbo nga namartir sa serye sa mga depensibang aksyon niadtong una hangtud ikaduhang semana sa Agosto sa Lambunao ug Calinog sa Iloilo.

Ang mga namartir nga rebolusyonaryo naggikan sa lain-laing henerasyon sa mga mamumuo, mag-uuma ug kabatan-onang estudyante. Ang mga namartir mao silang Benjamin Cortel (Mamang/Ruby) sa Barangay Aglonok niadtong Agosto 5, Jose Jerry Takaisan (Miller) sa Barangay Cabatangan niadtong Agosto 7 ug sila Romulo Ituriaga Gangoso (Pedik/Regan), Armando Rogelio Sabares (Nene/Kulot), Aurelio “Boy” Bosque (Rio/Zarko/Baijan), Jovelyn Silverio (Akay/Purang), ug Jielmor Gauranoc (Tango/Doc) sa Barangay Aglonok niadtong Agosto 8.

Nahitabo ang magkasunod nga mga engkwentro sa utlanan sa Janiuay, Lambunao ug Calinog sa Iloilo, Valderama sa Antique ug Libacao sa Aklan. Kining mga lugara dugay nang ginapailalum sa focused military operation kung asa ginabubu ang grabe ka daghang pwersa sa CAFGU, mga pulis ug sundalo sa 12th IB, 82nd IB, 61st IB ug DRC ilalum sa 3rd ID.

Samtang, ginasiguro pa ang identidad sa tulo pa ka namartir nga gianunsyo sa AFP nga silang Vicente Hinojales (Ka Emil), kalihim sa rehiyunal nga komite sa Partido sa Panay ug kagawad sa Komite Sentral; Concepcion Araneta-Bocala (Ka Concha), konsultant sa panaghisgot kalinaw; ug Rewilmar Torrato (Ka Vivian).

Adunay lig-ong ebidensya nga ang mga biktima gidakop ug gitortyur samtang anaa sa kustodiya sa militar. Kini subay sa mga samad dinunggaban ug mga bun-og sa lawas ug nakagapos nga mga tiil sa pipila ka patayng lawas nga nakuha sa mga pamilya.

Gihadlok ug gisulayan pa sa mga sundalo nga pugngan ang mga pamilya nga bawion ang mga patayng lawas sa ilang mga minahal sa kinabuhi. Ginatanyagan ang mga pamilya og “suportang pinansya” bugti sa dili pagpasaka og kaso.