Walay hunong ang paghari-hari sa militar sa 74th IB sa daghang lungsod sa Northern Samar. Grabe ang mga kaso sa paglapas sa tawhanong katungod ang padayong nadukomento dinhi sa nangaging mga semana.

Sa Palapag, gidakop ug gipatay sa 74th IB si Ryan Arnesto Sityo sa Canonghan, Barangay Osmeña samtang anaa sa koprasan niadtong Hulyo 8. Puno sa bun-og ug halos dili na mailhan ang patayng lawas ni Arnesto tungod sa hubag ug mga samad sa iyang nawong, mga braso ug paa. Aduna usay samad pinusilan sa iyang liog, ubos sa dughan ug sa kilid nga bahin.

Matud sa saksi, gigapos sa mga sundalo si Arnesto sa punuan sa lubi, gihiktan ug gibira ang ulo, ayha giratratan og bala. Daw mananap nga giguyod sa mga sundalo ang patayng lawas padulong sa kasikbit nga Barangay Bagacay.

Dungan nga gidakop sa mga sundalo sa 74th IB sa maong sityo si Marlo Turbanada, usa ka batan-ong mag-uuma. Gipailalum siya sa mga sundalo sa grabeng pisikal ug mental nga tortyur. Arbitraryo siyang gidetine ug pugos nga gipagiya sa mga operasyong kombat sa militar.

Sa laing bahin sa nasud, nataho ang mosunod nga mga kaso sa mga paglapas:

Pag-aresto. Arbitraryong giaresto sa mga pwersa sa estado ang kanhing kinatibuk-ang kalihim sa Karapatan-Southern Midanao nga si Jayvee “Jay” Apiag niadtong Agosto 13 sa Digos City. Gikasuhan siya sa pakyas nga pagpatay.

Pagpamig-ot. Subling gihadlok ug gihulga sa NTF-Elcac ang lider-estudyante ug tigpanalipud sa tawhanong katungod sa Cavite nga si Paolo Tarra. Balik-balik nga giadtoan sa mga ahente niini ang balay sa iyang pamilya niadtong Agosto 4 ug gihadlok nga pasakahan og kasong “terorismo.” Gihulga usab siyang dagiton kung dili mohunong sa progresibong mga aktibidad.

Demolisyon. Sa Tarlac City, unum ka balay sa mga mag-uuma sa Barangay Central, sakop sa Hacienda Luisita, ang giguba niadtong Agosto 12 sa mga maton sa gitawag og “Luisita warlord trio.” Sila mao ang mga pamilyang Lorenzo, Cojuangco ug Ayala. Ginapalayas sa maong barangay ang kapinkun-kulang 989 ka pamilya aron hatagag dalan ang ₱18 bilyong proyekto sa Ayala Land Inc. nga molangkub sa 290 ektaryang kayutaan dinhi.

Sa Bataan, dili moubos sa 26 ka pamilya sa mga mangingisda ang napalayas sa demolisyon sa Sityo Kabilang Ilog, Barangay Capunitan, Orion niadtong Agosto 12. Ang komunidad, nga nag-atubang sa Manila Bay, garekobir pa lamang gikan sa epekto sa oil spill ug sa bagyong Carina ug pag-ulan dala sa habagat. Ginapalayas sila alang sa planong negosyo nga tukuron sa lugar.

Sa Masbate, iligal nga namutol og kahoy ang mga sundalo sa 2nd IB sa komunidad sa mga mag-uuma sa Hacienda Mortuegue-Larrazabal niadtong Agosto 4. Ang asyenda langkub sa mga barangay sa Tubog sa Pio V. Corpuz ug Tawad sa lungsod sa Esperanza. Ginagamit kining taktika sa 2nd IB ug agalong yutaan aron abugon ug palayason ang mga mag-uuma sa asyenda.