Nagadako nga nagadako ang gintalana nga badyet ni Marcos para sa iya instrumento sang terorismo sang estado. Sa ginproponer nga badyet ni Marcos para sa 2025, talalupangdon ang plano nga 51% nga dugang nga kabilogan nga badyet para sa militar, halin sa ₱278.1 bilyon subong nga 2024 padulong ₱419.3 bilyon para sa 2025. Dako nga bahin sini ang magakadto sa Armed Forces of the Philippines (AFP) nga makabaton sang ₱242.8 bilyon.

Halos tanan nga sanga sang AFP ang makabaton sang dugang-badyet sa 2025, pinakataas ang Philippine Navy, nga magadako halin ₱41.4 bilyon padulong ₱49 bilyon. Kasubong man sini ang para sa Philippine Army nga makabaton sang dugang nga ₱1.8 bilyon, kag Philippine Air Force, nga makabaton sang dugang nga ₱4.6 bilyon.

Dako man ang mangin saka sa pondo sang Revised AFP Modernization program (RAFPMP), nga natalana nga makabaton sang 25% nga dugang-badyet, halin sa ₱40 bilyon padulong ₱50 bilyon. West Philippine Sea ang ginhimo nga rason para sa nasambit nga pagsaka. Sa RAFPMP ginakuha sang militar ang pangbakal sang nagkalain-lain nga armas nga ginagamit sini sa pagsabwag sang terorismo sa kabukiran, kasubong sang pagbakal sang pila ka bats sang Elbit drone systems sa Israel, attack helicopter, mga barko pang-gyera, kag radar systems sang nagligad nga mga tinuig. Tuyo sang AFP nga magbakal sang mga bag-o nga FA-50PH light jet fighters halin sa South Korea gamit ang pondo sa 2025.

Sa pang-gyera nga postura sini sa West Philippine Sea, pagabubuan man sang pondo ang Philippine Coast Guard nga makabaton sang ₱31.3 bilyon, nga pagagamiton kuno para sa pagpatukod sang ospital (₱386 milyon), pagtukod sang West and South Navigational Tele Project (₱452 milyon), kag Radar for Cebu Vessel Traffic Management System (₱37 milyon).

Nalubong sa libo-libo ka pahina sang badyet sang reaksyunaryong gubyerno ang plano sini para sa tuigan nga pagbakal sang 120,000 set sang uniporme sang mga soldado kag halos 110,000 set sang combat boots halin sa 2025 tubtob 2029, nga may kabilugan nga bili nga ₱3.77 bilyon.

Samtang, dako sa gihapon ang paglumpat sang badyet sang Philippine National Police (PNP), nga naghabok halin sa subong nga ₱198.3 bilyon nga badyet padulong sa ₱206.2 bilyon. May natigana nga ₱581 milyon para magrekrut sang 2,000 ka bag-o nga pulis. Nagtigana man sang ₱450 milyon para magtukod sang dugang nga 37 ka istasyon sang pulis sa pungsod.

Wala man nagpa-ulihi ang National Task Force to End Local Communist Armed Conflict (NTF-ELCAC) nga nagtigana sang ₱7.8 bilyon para sa Barangay Development Program sini, nga madugay na nabuko nga porma sang pork barrel sang mga heneral.

May ₱4 bilyon nga badyet man sa masunod nga tuig ang Philippine Drug Enforcement Agency para sa pagpadayon sang maduguon nga drug war.

Padayon man nga ginatigan-an ang confidential and intelligence funds (CIF), nga may kabilugan nga ₱10.3 bilyon nga badyet. Magalab-ot sa ₱5.9 bilyon diri ang para sa intelligence funds, ukon pondo panilag para sa mga unipormado nga ahensya, kag ₱4.4 bilyon naman ang para sa confidential funds, nga pondo panilag para sa mga sibilyan nga ahensya. Ginapadayaw ni Marcos nga mas gamay ang badyet sang confidential funds tungod ginkakas ang badyet para diri sa pila ka ahensya pareho sang Office of the Vice President.

Apang, ang wala ginahambal sang reaksyunaryong gobyerno amo ang kon paano sini mahapos nga mahampang ang pondo para sa CIF nga wala sang may makatalupangod. Sa ginproponer sadtong 2024, ₱5.3 bilyon lang ang gintigana para sa intelligence funds, pero sang nangin laye, gulpi nga nadugangan ini sang ₱2.9 bilyon padulong ₱8.3 bilyon.

Samtang tuman ka busog ang pondo sang militar kag pulis, nagapangatubang naman sang dalagkuan nga pagbuhin ang mga ahensya sang reaksyunaryong gobyerno nga dapat kuntani nagahatag sang direkta nga serbisyo, lakip na ang Department of Health nga may ₱23.4 bilyon nga ginbuhin, Department of Labor and Employment (₱14.4 bilyon), Department of Social Welfare and Development (₱18.4 bilyon), kag bisan state universities and colleges nga ginbuhinan sang ₱19.2 bilyon.

Isa sa pinakadako nga ginbuhinan amo ang pondo para sa mga imol nga pasyente sa ila gasto pang-ospital (₱31.2 bilyon).