3 ka adlaw nga hunong-pasada kontra jeepney phaseout, subling miarangkada. Subling naglunsad og hunong-pasada sa Metro Manila niadtong Agosto 14-16 ang mga drayber ug opereytor sa mga dyip batok sa kontra-kabus ug maki-langyaw programang “modernisasyon” sa transportasyon. Gimakmak nila si Ferdinand Marcos Jr sa pagbalibad nga dunggon ang resolusyon sa Senado nga nagsugyot nga isuspinde ang programa aron sulbaron una ang mga isyu nga ginareklamo sa mga tsuper ug opereytor. Gipirmahan kini sa tanang senador gawas kang Risa Hontiveros sa Akbayan. Gipangunahan ang hunong-pasada sa Piston ug Manibela.

MATATAG kurikulum, ginapabasura. Anaa sa 100 ka magtutudlo ug mamumuo sa edukasyon ilalum sa ACT ang nagprotesta atubangan sa DepEd sa Pasig City niadtong Agosto 15 aron ipanawagan ang hinanaling pagbasura sa MATATAG kurikulum. Matud nila, sobra-sobrang trabaho ug paantus ang gibunga niini sa mga titser, nga ginapagrabe sa mumho nga dugang-sweldo sa rehimeng Marcos. Gisaway nila ang pagpatuman sa kurikulum bisan walay igong pag-ases sa krisis sa pagkat-on ug tinuod ug demokratikong konsultasyon sa mga magtutudlo ug mga mamumuo sa edukasyon. Ginahago niini ang magtutudlo sa bug-at kaayong trabaho ug gipagamay nga oras sa matag natad sa pagkat-on.

Petisyon alang sa writ of amparo ug habeas data, gipasaka sa Korte Suprema. Nagpiket atubangan sa Korte Suprema sa Maynila ang mga pamilya sa mga desaparesido nga silang Dexter Capuyan ug Gene Roz Jamil de Jesus (Bazoo) ug ilang mga abugado niadtong Agosto 14 human magpasaka og writ of amparo ug writ of habeas data sa korte. Gipasaka kini sa mga paryente sa mga biktima human gibasura sa Court of Appeals ang unang petisyon niadtong Setyembre 2023.

Pagpanumpo sa mga lider-estudyante. Sa Tacloban City, bangis nga gibungkag sa mga pulis ang lihok-protesta sa mga lider-estudyante sa UP niadtong Agosto 16. Anaa sila sa syudad alang sa tinuig nga panagtapok sa mga konseho sa mga estudyante sa UP. Sa protesta, giguyod sa mga pulis ug gipusasan ang usa ka lider-estudyante. Gikordon usab sa mga pulis ug gipugngang mogawas sulod sa duha ka oras ang 100 ka estudyante.