Dumakdakkel a dumakdakkel ti inlatang ni Marcos para iti instrumento na ti terorismo ti estado. Iti gakat a badyet ni Marcos para iti 2025, kadidillaw ti plano a 51% a nayon a kabuklan a badyet para iti militar, manipud iti ₱278.1 bilyon tatta 2024 agturong ti ₱419.3 bilyon iti 2025. Dakkel a paset daytoy ket mapan iti Armed Forces of the Philippines a makaawat ti ₱242.8 bilyon.

Gistay amin a sangay ti AFP ket makaawat ti nayon a badyet iti 2025, kangatuan ti Philippine Navy, a dumakkel manipud ₱41.4 bilyon agturong ti ₱49 bilyon. Kastoy met ti para iti Philippine Army a makaawat ti nayon a ₱1.8 bilyon, ken Philippine Air Force, a makaawat ti nayon a ₱4.6 bilyon.

Dakkel met ti agbalin a nayon ti pondo ti Revised AFP Modernization Program (RAFPMP), a naikeddeng a makaawat ti 25% a nayon a badyet, manipud ₱40 bilyon agturong ti ₱50 bilyon. Ti West Philippine Sea ti maar-aramat a rason para iti nasao a panagngato. Iti RAFPMP nga al-alaen ti militar ti panggatang ti nadumaduma nga armas nga ar-aramaten daytoy iti panangipasaknap ti terorismo iti kaaw-awayan, kas ti panaggatang ti mano a bats ti Elbit drone systems iti Israel, attack helicopter, dagiti barko a panggubat, ken radar systems kadagiti napalabas a tawen. Plano ti AFP a gumatang kadagiti baro nga FA-50PH light jet fighters manipud iti South Korea usar ti pondo iti 2025.

Iti sangalubongan a postura daytoy iti West Philippine Sea, mabukbokan met ti pondo ti Philippine Coast Guard a makaawat ti ₱31.3 bilyon, a maaramat kano para iti panagitakder ti ospital (₱386 milyon), ken Radar for Cebu Vessel Traffic Management System (₱37 milyon).

Nakapalaon iti rinibo a panid ti badyet ti reaksyunaryo a gubyerno ti plano daytoy para iti tinawen a panggatang ti 120,000 a pares ti uniporme dagiti soldado ken agarup 110,000 a pares ti combat boots manipud 2025 agingga 2029, nga addaan kabuklan a gatad a ₱3.77 bilyon.

Kabayatanna, nangato met ti panaglagto ti badyet ti Philippine National Police (PNP) a dumakkel manipud iti agdama a ₱198.3 bilyon agturong ti ₱206.2 bilyon. Adda ti nakalatang a ₱581 milyon tapno agrekrut ti 2,000 baro a pulis. Nailatang met ti ₱450 milyon tapno agipatakder ti nayon a 37 nga istasyon ti pulis iti pagilyan.

Saan met nga agpaudi ti National Task Force to End Local Communist Armed Conflict (NTF-Elcac) a nailatangan ti ₱7.8 bilyon para iti Barangay Development Program na, a nabayagen a nabisto a porma ti pork barrel dagiti heneral.

Adda met ti ₱4 bilyon a badyet iti sumaruno a tawen ti Philippine Drug Enforcement Agency para iti panangituloy iti nadara a drug war.

Agtultuloy met a mailatlatangan ti confidential and intelligence funds (CIF), nga addaan kabuklan a ₱10.3 bilyon a badyet. Dumanon iti ₱5.9 bilyon ditoy ti para iti intelligence funds, wenno pondo a pang-espiya para kadagiti sibilyan nga ahensya. Ipanpannakkel ni Marcos a basbassit ti badyet ti confidential funds gapu ta naikkat ti badyet para ditoy iti sumagmamano nga ahensya kas ti Office of the Vice President.

Nu pay kasta, ti saan a dakdakamaten ti reaksyunaryo a gubyerno ket nu kasano na nga alisto nga ay-ayamen ti pondo para iti CIF nga awan ti makasipot. Iti gakat idi 2024, ₱5.3 bilyon laeng ti nailatang para iti intelligence funds, ngem idi nagbalin a linteg, kellaat a nanayunan daytoy ti ₱2.9 bilyon agturong ti ₱8.3 bilyon.

Bayat nga agbutbutyog ti pondo ti militar ken pulis, sumangsango met iti dadakkel a panagkissay dagiti ahensya ti reaksyunaryo a gubyerno a rumbeng koma nga agit-ited ti direkta a serbisyo, kabilangen ti Department of Health nga addaan ti ₱23.4 bilyon a kaltas, Department of Labor and Employment (₱14.4 bilyon), Department of Social Welfare and Development (₱18.4 bilyon), ken uray dagiti state universities and colleges a makaltasan ti ₱19.2 bilyon.

Maysa kadagiti kadakkelan a makissayan ket ti pondo para kadagiti nakurapay a pasyente para iti gastos da a pang-ospital (₱31.2 bilyon).