Nasamdan sa paturagas nga pagpamusil sa mga pwersang militar sa Zionistang Israel si Amado Sison, aktibistang Pilipino-Amerikano, samtang nagbidyo sa protesta sa Beita, West Bank sa giokupang kayutaan sa Palestine niadtong Agosto 9. Sumala niya, midagan sila dihang gibungkag ang protesta ug didto siya naigo sa hita. Migamit usab kuno og tear gas ang mga pwersa sa Israel.

Ang pag-atake sa protesta nahitabo human sa walay hunong nga pag-atake sa Zionistang Israel, sa suporta sa imperyalismong US, sa mga Palestino sa Gaza Strip ug okupadong teritoryo sa West Bank.

Sukad Agosto 15, 15,000 ang nagprotesta sa Chicago sa pag-abli sa nasudnong katiguman sa partidong Democrat aron ipanawagan sa kandidato niining si Kamala Harris nga mobarog batok sa henosidyo. Niining Agosto usab, padayon ang dinagkung mga rali para sa pagsuporta sa Palestine sa France, United Kingdom, Sweden ug Spain.

Sa ulahing rekord niadtong Agosto 18, kapin 40,000 na ang gipatay sa Israel nga mga Palestino sa Gaza Strip ug West Bank. Halos 100,000 usab ang natahong nasamdan sa mga pag-atake niini ug gatusan ka libo na ang napalayas sa ilang yuta.