Gidumdum sa mga grupong katutubo sa lain-laing panig sa Pilipinas ang Pangkalibutang Adlaw sa mga Katutubo niadtong Agosto 9. Sa pagpanguna sa Katribu Kalipunan ng Katutubong Mamamayan ng Pilipinas, kauban ang mga grupong nasudnon-demokratiko ug maki-kinaiyahan, gidala nila sa Camp Aguinaldo, ug mga upisina sa Department of Environment and Natural Resources, ug National Commission on Indigenous Peoples ang ilang mga reklamo.

Gikundena nila ang AFP sa militarisasyon, pagpamomba, pagpamig-ot niini sa mga komunidad sa katutubo. Gipanghingusog usab nila sa DENR ang katungod sa mga nasudnong minorya sa yutang kabilin ug kaugalingong paghukum atubangan sa padayon nga pagbaligya sa langyaw sa ilang kinaiyanhong bahandi ug militarisasyon sa ilang komunidad. Gikundena nila ang ahensya sa pakigkunsabo sa dagkung kumpanya sa mina ug dam nga nagaguba sa kinaiyahan ug nagpalayas kanila gikan sa ilang mga yuta.

Sa NCIP, gipapanubag nila ang ahensya sa makanunayong pagpasagad niini sa mga komunidad sa nasudnong minorya. Gisingil nila ang ahensya sa kainutil niini atubangan sa malukpanong paglapas sa katungod sa mga tigpanalipud sa mga lumad, sama nilang Dexter Capuyan ug Bazoo de Jesus, ug ang dili makatarunganong paghukum nga sad-an ang Talaingod 13. Gimakmak usab nila ang ahensya sa pag-usab niini sa proseso sa pagkuha og FPIC nga wala ginakonsulta ang mga lumad. Ingonman, gisingil nila ang ahensya sa hugot nga pakigtinabangay niini sa NTF-Elcac, nga instrumento sa dinaghang paglapas sa katungod sa mga nasudnong minorya.