3 ka adlaw nga untat byahe kontra jeepney phaseout, liwat nga nag-arangkada. Liwat nga naglunsar sang untat byahe sa Metro Manila sadtong Agosto 14-16 ang mga drayber kag opereytor sang mga dyip batuk sa kontra-imol kag maki-dumuluong nga programang “modernisasyon” sa transportasyon. Ginbatikos nila si Ferdinand Marcos Jr sa pagdumili nga pamati-an ang resolusyon sang Senado nga naga-proponer nga isuspinde ang programa para sabton anay ang mga hambalonon nga ginareklamo sang mga drayber kag opereytor. Ginpirmahan ini sang tanan nga senador magluwas kay Risa Hontiveros sang Akbayan. Ginpangunahan ang untat-byahe sang Piston kag Manibela.

MATATAG kurikulum, ginapabasura. Kapin sa 100 ka manunudlo kag mamumugon sa edukasyon sa idalom sang ACT ang nagprotesta sa atubang sang DepEd sa Pasig City sadtong Agosto 15 para ipanawagan ang gilayon nga pagbasura sa MATATAG kurikulum. Siling nila, sobra-sobra nga trabaho kag paantus ang ginatuga sini sa mga titser, nga ginapalala sang gamay nga dugang-sweldo sang rehimen Marcos. Saway nila, basta na lang ginpatuman ang kurikulum subong nga school year nga wala sang nagaka-igo nga pag-analisa sa krisis sang pagtuon kag matuod kag demokratiko nga konsultasyon sa mga manunudlo kag mga mamumugon sa edukasyon. Ginakapoy sini ang manunudlo sa sobra-sobra ka bug-at nga trabaho kag ginpalip-ot nga oras kada patag sang pagtuon.

Petisyon para sa writ of amparo kag habeas data, ginpasa sa Korte Suprema. Nagpiket sa atubang sang Korte Suprema sa Manila ang mga pamilya sang mga desaparecido nga sila ni Dexter Capuyan kag Gene Roz Jamil de Jesus (Bazoo) kag ila mga abogado sadtong Agosto 14 pagkatapos magpasa sang writ of amparo kag writ of habeas data sa korte. Ginpasaka ini sang mga himata sang mga biktima pagkatapos ibasura sang Court of Appeals ang una nga petisyon sadtong Setyembre 2023.

Pagpanumpo sa mga lider-estudyante. Sa Tacloban City, mapintas nga ginbungkag sang mga pulis ang hublag-protesta sang mga lider-estudyante sang UP sadtong Agosto 16. Yara sila sa syudad para sa tuigan nga pagtililipon sang mga konseho sang mga estudyante sang UP. Sa protesta, ginguyod sang mga pulis kag ginposasan ang isa ka lider-estudyante. Ginkordon naman sang mga pulis kag ginpunggan nga mag-gwa sang duha ka oras ang may 100 ka estudyante.