3-araw a sardeng-pasada kontra jeepney phase-out, balbaliw nga immarangkada. Balbaliw a nagisayangkat ti sardeng-pasada dagiti tsuper ken opereytor dagiti dyip laban iti kontra-marigrigat ken maka-gangannaet a programa a “modernisasyon” iti transportasyon idiay Metro Manila idi Agosto 14-16. Binabalaw da ni Ferdinand Marcos Jr iti panagkedked na a denggen ti resolusyon a lungalong ti Senado nga isuspindi ti programa tapno sungbatan pay dagiti isyu nga irekreklamo dagiti tsuper ken opereytor. Pinirmaan daytoy ti amin a senador malaksid ken Risa Hontiveros ti Akbayan. Ti sardeng-pasada ket iyun-una ti Piston ken Manibela.

MANIBELA kurikulum, maipabpabasura. Adda iti 100 a manursuro ken mangmangged iti edukasyon iti sidong ti ACT ti nagprotesta iti sango ti DepEd iti Pasig City idi Agosto 5 tapno ipanawagan ti madagdagus a panangibasura iti MATATAG kurikulum. Kunada, sobra-sobra a trabaho ken parigat ti ipapaay daytoy kadagiti manursuro, a pakpakaruen ti nakabasbassit a nayon a pasweldo ti rehimen Marcos. Ti dillaw da, basta laeng naipatungpal ti kurikulum tatta nga school year nga awan naan-anay a panag-ases iti krisis ti pannakasursuro ken pudno a demokratiko a konsultasyon kadagiti manursuro ken dagiti mangmangged iti edukasyon. Banbannogen daytoy dagiti manursuro iti nalablabes a nadagsen a trabaho ken pinaababa nga oras iti tunggal benneg ti pannakasursuro.

Petisyon para iti writ of amparo ken habeas data, naidatag iti Korte Suprema. Nagpiket iti sango ti Korte Suprema idiay Manila dagiti pamilya dagiti desaparecido a da Dexter Capuyan ken Gene Roz Jamil de Jesus (Bazoo) ken dagiti abugado da idi Agosto 14 kalpasan nga agidatag da ti writ of amparo ken writ of habeas data iti korte. Inyuli daytoy dagiti kabagian dagiti biktima kalpasan nga ibasura ti Court of Appeals ti immuna a petisyon idi Setyembre 2023.

Panangpawil kadagiti lider-estudyante. Idiay Tacloban City, naranggas a dinuprak dagiti pulis ti tignay-protesta dagiti lider-estudyante ti UP idi Agosto 16. Adda da iti syudad para iti tinawen a panagtitipon dagiti konseho dagiti agad-adal iti UP. Iti protesta, ginuyod ken pinosasan dagiti pulis ti maysa a lider-estudyante. Kinordon met dagiti pulis ken linapdan a makaruar ti dua nga oras ti agarup 100 nga estudyante.