Linagip dagiti grupo ti katutubo iti nadumaduma a paset ti Pilipinas ti Sangalubongan nga Aldaw dagiti Katutubo nga Umili ti Pilipinas idi Agosto 9. Iti panangiyuna ti Katribu Kalipunan ng Katutubong Mamamayan ng Pilipinas, karaman dagiti nailian-demokratiko a grupo ken maka-kalikasan, inpanda idiay Camp Aguinaldo, ken kadagiti upisina ti Department of Environment and Natural Resources ken National Commission on Indigenous Peoples dagiti arungaing da.

Kinundenar da ti AFP iti militarisasyon, panagbomba ken panaglipit daytoy kadagiti komunidad ti katutubo. Inpetteng da met iti DENR ti karbengan dagiti nailian a minorya iti tawid a daga ken bukod a pangngeddeng iti sango ti agtultuloy a panangilako iti gangannaet ti natural a kinabaknang tayo ken militarisasyon ti komunidad da. Kinundenar da ti ahensya iti pannakikumplot daytoy iti dadakkel a kumpanya iti minas ken dam a mangperperdi iti law-ang ken mangpadpadisi kadakuada manipud kadagiti daga da.

Iti NCIP, pinagsungbat da ti ahensya iti awan-sarday a panagbaybay-a daytoy kadagiti komunidad ti katutubo. Siningir da ti ahensya iti kinainutil daytoy iti sango ti nasaknap a panaglabsing iti karbengan-tao dagiti salaknib dagiti katutubo, kas kada Dexter Capuyan ken Bazoo de Jesus, ken ti saan a nainkalintegan a pananghusga ti korte a nagbasol ti Talaingod 13. Binabalaw da met ti ahensya iti panangbaliw daytoy iti proseso ti panangala ti FPIC a saan a makunsulta dagiti katutubo. Kasta met a siningir da ti ahensya iti nairut a pannakisilpo daytoy iti NTF-Elcac, nga instrumento iti adu a panaglabsing iti karbengan-tao dagiti nailian a minorya.