Gindumdom sang mga grupo sang tumandok sa nagkalain-lain nga bahin sang Pilipinas ang Pangkalibutanon nga Adlaw sang mga tumandok sadtong Agosto 9. Sa pagpanguna sang Katribu Kalipunan ng mga Katutubong Mamamayan ng Pilipinas, upod ang mga grupo nga pungsodnon-demokratiko kag maki-kapalibutan, gindala nila sa Camp Aguinaldo, kag mga upisina sang Department of Environment and Natural Resources, kag National Commission on Indigenous Peoples ang ila mga reklamo.

Ginpakamalaot nila ang AFP sa militarisasyon, pagpangbomba, pagpang-ipit sini sa mga komunidad sang tumandok. Ginaduso naman nila sa DENR ang kinamatarung sang mga pungsodnon nga minorya sa dutang ginpanubli kag kaugalingon nga pagbuot sa atubang sang padayon nga pagbaligya sa dumuluong sang aton dunang manggad kag militarisasyon sang ila nga komunidad. Ginkundenar nila ang ahensya sa pagpakigkunsabuhay sa dalagko nga kumpaniya sang mina kag dam nga nagaguba sa kapalibutan kag nagapalayas sa ila halin sa ila mga duta.

Sa NCIP, ginpasabat nila ang ahensya sa sige-sige nga pagpabaya sini sa mga komunidad sang tumandok. Ginasukot nila ang ahensya sa pagka-inutil sini sa atubang sang lapnagon nga paglapas sa tawhanon nga kinamatarung sang mga tigpangapin sang mga tumandok, pareho nanday Dexter Capuyan kag Bazoo de Jesus, kag ang indi makatarunganon nga pagpamatbat nga nakasala ang Talaingod 13. Ginbatikos man nila ang ahensya sa pagbag-o sini sang proseso sang pagkuha sang FPIC nga wala ginakonsulta ang mga tumandok. Subong man, ginasukot nila ang ahensya sa hugot nga pagpakig-angot sini sa NTF-Elcac, nga instrumento sa madamo nga paglapas sa tawhanon nga kinamatarung sang mga pungsodnon nga minorya.