Padpadayawan ken binigbig ti Communist Party of the Philippines (CPP), New People’s Army NPA) ken sibubukel a rebolusyonaryo a tignay ken masa ti 10 a kadre ti Partido ken Nalabbaga a hukbo a namartir iti serye dagiti depensiba nga aksyon idi umuna agingga maikadwa a lawas ti Agosto iti Lambunao ken Calinog iti Iloilo.

Dagiti napasag a rebolusyonaryo ket nagtaud iti nadumaduma a henerasyon dagiti mangmangged, mannalon ken kabataan-estudyante. Nabigbig dagiti namartir a da Benjamin Cortel (Mamang/Ruby) a napasag idiay Barangay Aglonok idi Agosto 5, Jose Jerry Takaisan (Miller) a namartir idiay Barangay Cabatangan idi Agosto 7 ken da Romulo Ituriaga Gangoso (Pedik/Regan), Armando Rogelio Sabares (Nene/Kulot), Aurelio “Boy” Bosque (Rio/Zarko/Baijan), Jovelyn Silverio (Akay/Purang), ken Jielmor Gauranoc (Tango/Doc) a napasag idiay Barangay Aglonok idi Agosto 8.

Napasamak ti agsasaruno a labanan iti nagbeddengan ti Janiuay, Lambunao ken Calinog iti Iloilo, Valderama iti Antique ken Libacao iti Aklan. Dagitoy a lugar ket nabayagen a maipaspasidong iti focused military operation nu sadinno a maibukbukbok ti nakad-ado a pwersa ti CAFGU, pulis ken soldado a 12th IB, 82nd IB, 61st IB ken DRC iti sidong ti 3rd ID.

Kabayatanna, maisigsigurado pay ti pakabigbigan ti tallo pay a namartir nga inyanunsyo ti AFP a da Vicente Hinojales (Ka Emil), kalihim ti rehiyunal a komite ti Partido iti Panay ken kagawad ti Komite Sentral; Concepcion Araneta-Bocala (Ka Concha), consultant iti saritaan iti kappia ken Rewilmar Torrato (Ka Vivian).

Adda ti natibker nga ebidensya a dagiti biktima ket nakemmeg ken naparigat bayat nga adda iti kustodiya ti militar. Daytoy ket basar kadagiti bagsol ken dunor iti bagi ken pannakapungo dagiti saka ken sumagmamano pay a gapuanan a naala dagiti pamilya.

Kinigtot ken ginandat pay dagiti soldado a lapdan dagiti kakabagyan nga alaen dagiti bangkay dagiti ingunguten da iti biag. Maididiaya kadagiti pamilya ti “suporta a pinansyal” kasukat ti saanda a panagdarum.