Ginasaluduhan kag ginkilala sang Partido Komunista ng Pilipinas, Bagong Hukbong Bayan (BHB), kag bug-os nga rebolusyonaryong kahublagan kag masa ang 10 ka kadre sang Partido kag Pulang hukbo nga namartir sa asud-asod nga mga depensibang aksyon sadtong una tubtob ikaduha nga semana sang Agosto sa Lambunao kag Calinog sa Iloilo.

Ang mga napatay nga rebolusyonaryo ang naghalin sa nagkalain-lain nga henerasyon sang mga mamumugon, mangunguma kag pamatan-on nga estudyante. Ginkilala ang mga namartir nga sila ni Benjamin Cortel (Mamang/Ruby) nga napatay sa Barangay Aglonok sadtong Agosto 5, Jose Jerry Takaisan (Miller) nga namartir sa Barangay Cabatangan sadtong Agosto 7 kag sila ni Romulo Ituriaga Gangoso (Pedik/Regan), Armando Rogelio Sabares (Nene/Kulot), Aurelio “Boy” Bosque (Rio/Zarko/Baijan), Jovelyn Silverio (Akay/Purang), kag Jielmor Gauranoc (Tango/Doc) nga napatay sa Barangay Aglonok sadtong Agosto 8.

Nahitabo ang sundanay nga mga inaway sa dulunan sang Janiuay, Lambunao kag Calinog sa Iloilo, Valderama sa Antique kag Libacao sa Aklan. Ang mga lugar nga ini ang madugay na nga ginpaidalom sa focused military operation kon sa diin ginabubo ang tuman ka damo nga pwersa sang CAFGU, mga pulis kag soldado nga 12th IB, 82nd IB, 61st IB kag DRC sa idalom sang 3rd ID.

Samtang, ginapat-ud pa ang pagkilala sa tatlo ka iban pa nga namartir nga gin-anunsyo sang AFP nga sila ni Vicente Hinojales (Ka Emil), sekretaryo sang rehiyunal nga komite sang Partido sa Panay kag kagawad sang Komite Sentral; Conception Araneta-Bocala (Ka Concha), konsultant sa estoryahanay pangkalinong; kag Rewilmar Torrato (Ka Vivian).

May yara sang mabakod nga ebidensya nga ang mga biktima nadakop kag ginpa-antus samtang yara sa kustodiya sang militar. Ini ang base sa mga buno kag lagub sa lawas kag nakagapos nga mga tiil sang pila ka bangkay nga nakuha sang mga pamilya.

Ginpahog kag gintinguhaan pa sang mga soldado nga punggan ang mga himata nga bawion ang mga bangkay sang ila mga pinalangga sa kabuhi. Gintanyagan ang mga pamilya sang “suporta pampinansya” kabaylo sang indi pagpasaka sang kaso.