Napilasan sa patarasak nga pagpaniro sang mga pwersa militar sang Zionista nga Israel si Amado Sison, aktibista nga Pilipino-Amerikano, samtang nagakuha sang bidyo sa protesta sa Beita, West Bank sa okupado nga duta sang Palestine sadtong Agosto 9. Suno sa iya, nagdalagan sila sang ginbungkag ang protesta kag didto siya gintiro sa hita. Naggamit man kuno sang tear gas ang mga pwersa sang Israel.

Ang pagsalakay sa protesta ang kasunod sang wala untat nga pag-atake sang Zionista nga Israel, sa suporta sang imperyalismong US, sa mga Palestino sa Gaza Strip kag okupado nga teritoryo sa West Bank.

Sugod Agosto 15, 15,000 ang nagprotesta sa Chicago sa pagbukas sang pungsodnon nga sinapol sang partido nga Democrat para ipanawagan sa kandidato sini nga si Kamala Harris nga manindugan batuk sa henosidyo. Sini nga Agosto man, padayon ang dalagkuan nga mga rali nga maki-Palestine sa France, United Kingdom, Sweden kag Spain.

Sa ulihi nga nalista sadtong Agosto 18, sobra 40,000 na ang ginpatay sang Israel nga mga Palestino sa Gaza Strip kag West Bank. Halos 100,000 naman ang nalista nga napilasan sa mga pag-atake sini kag ginatos ka libo na ang napalayas sa ila nga kadutaan.