Ginbulabog sang mga Pulang hangaway sang Bagong Hukbong Bayan (BHB)-Masbate (Jose Rapsing Command) ang mga soldado sang Armed Forces of the Philippines (AFP) sa sundanay nga operasyon haras sa duha ka hamulag nga kampo militar sa banwa sang Milagros, Masbate sadtong Agosto 10. Gin-igo sang BHB-Masbate ang kampo sang 93rd Division Reconnaissance Company sa Sityo San Jose, Barangay Hamorawon kag kampo sang 2nd IB sa Barangay San Antonio alas-9 sang gab-i.

Suno sa yunit, kabahin ini sang pagpakita sang ila pagkundenar sa ginapatigayon nga Pacific Partnership 2024-2 (PP24-2) “humanitarian mission” sang mga tropang Amerikano kag Pilipino sa Legazpi City, Albay sa rehiyon sang Bicol halin Agosto 1 tubtob 14.

Sa North Central Mindanao, indi magnubo sa anom ka mga soldado sang AFP ang napatay sa pag-atake kag aktibo nga depensa sang BHB sadtong Marso kag Hulyo. Samtang, 12 ka soldado naman ang nalista nga napilasan sa mga armado nga aksyon nga ini.

Sa Bukidnon, ginpalukpan sang BHB ang naga-operasyon nga tropa sang AFP sa Barangay Manalog, Malaybalay City sadtong Hulyo 5. Samtang sadtong Marso 6, nauna nga nagpalupok ang BHB batuk sa naga-atake nga mga soldado sa Barangay Indalasa. Nakadepensa naman ang BHB sadtong Marso 18 sang aga sa Barangay Dominorog, Talakag.

Sa Lanao del Sur, napaslaw sang BHB ang pag-atake sang AFP sa dulunan sang banwa sang Maguing kag Bumbaran sadtong Marso 11.