Wala lang-at ang paghari militar sang 74th IB sa madamo nga banwa sang Northern Samar. Wala-tuo nga mga kaso sa paglapas sang tawhanon nga kinamatarung ang padayon nga nalista diri sa nagligad nga mga semana.

Sa Palapag, gindakop kag ginpatay sang 74th IB si Ryan Arnesto sa Sityo Canonghan, Barangay Osmeña samtang yara sa koprasan sadtong Hulyo 8. Puno sa kastigo kag halos indi makilal-an ang bangkay ni Arnesto tungod sa paghubag kag mga kihad sang kutsilyo sa iya nga guya, mga butkon kag tiil. May igo man siya sang bala sa liog, sa idalom sang dughan kag sa kilid.

Suno sa saksi, gingapos sang mga soldado si Arnesto sa puno sang lubi ginhigtan kag ginbutong ang ulo, antes gintadtad sang bala. Daw sapat nga ginguyod sang mga ini ang bangkay padulong sa katambi nga Barangay Bagacay.

Kadungan nga gindakop sang mga soldado sang 74th IB sa nasambit nga sityo si Marlo Turbanada, isa ka pamatan-on nga mangunguma. Ginpaidalom siya sang mga soldado sa grabe nga pisikal kag mental nga tortyur. Arbitraryo siya nga ginditine kag pilit nga ginapagiya sa mga operasyon kombat sang militar.

Sa iban nga bahin sang pungsod, nalista ang masunod nga mga kaso sang mga paglapas:

Pag-aresto. Arbitraryo nga gin-aresto sang mga pwersa sang estado ang anay sekretaryo heneral sang Karapatan-Southern Mindanao nga si Jayvee “Jay” Apiag sadtong Agosto 13 sa Digos City. Ginkasuhan siya sang paslaw nga pagpatay.

Pagpang-ipit. Liwat nga ginpahog kag ginpaandaman sang NTF-Elcac ang lider-estudyante kag tigpangapin sang tawhanon nga kinamatarung sa Cavite nga si Paolo Tarra. Pasulit-sulit nga ginkadtuan sang mga ahente sini ang balay sang iya nga pamilya sadtong Agosto 4 kag ginpahog nga pasakaan sang kaso nga “terorismo.” Ginpaandaman man siya nga i-abdak kon indi mag-untat sa progresibo nga mga aktibidad.

Demolisyon. Sa Tarlac City, anom ka balay sang mga mangunguma sa Barangay Central, sakop sang Hacienda Luisita, ang ginguba sadtong Agosto 12 sang mga tinawo nga gintawag nga “Luisita warlord trio.” Ang “trio” nga ini ang mga pamilya Lorenzo, Cojuangco kag Ayala. Ginapalayas sa nasambit nga barangay ang mas o menos 989 ka pamilya para hatagan dalan ang ₱18 bilyon nga proyekto sang Ayala Land Inc. nga magasakop sa 290 ka ektarya nga duta diri.

Sa Bataan, indi magnubo sa 26 ka pamilya sang mga mangingisda ang napalayas sa demolisyon sa Sityo Kabilang Ilog, Barangay Capunitan, Orion sadtong Agosto 12. Ang komunidad, nga naga-atubang sa Manila Bay, ang nagabangon pa lang halin sa epekto sang oil spill kag kasan-o lang nga bagyong Carina kag pag-ulan nga tuga sang habagat. Ginapalayas sila para sa tuyo nga negosyo nga pagatukoron sa lugar.

Sa Masbate, iligal nga nag-utod sang puno sang kahoy ang mga soldado sang 2nd IB sa komunidad sang mga mangunguma sa Hacienda Martuegue-Larrazabal sadtong Agosto 4. Ang asyenda ang sakop sang mga barangay sang Tubog sa Pio V. Corpuz kag Tawad sa banwa sang Esperanza. Ginagamit ini nga taktika sang 2nd IB kag agalon mayduta para tabugon kag palayason ang mga mangunguma sa asyenda.