Wala-tuo ang pagbatikos sa “deklarasyon sang kooperasyon” sang University of the Philippines (UP) kag Armed Forces of the Philippines (AFP) nga ginpirmahan sadtong Agosto 8. Dako nga paglapak ini sa akademiko nga kahilwayan, suno sa mga kritiko.

Ang pagsulod sang unibersidad sa kasugtanan nga ini ang magatulod sa UP nga mangin kakunsabo sa lapnagon nga mga paglapas sa tawhanon nga kinamatarung kag pampulitika nga pagpanumpo nga ginahimo sang AFP, suno sa mga nagapamatok diri. Ginahimo sini nga lehitimo ang ginahimo nga pagpanumpo sa kritikal nga mga tingog kag progresibo nga inisyatiba sa sulod sang unibersidad nga ginabansagan sang AFP nga pamahog sa “pungsodnon nga seguridad.”

Pangapinan ang UP. Ginlunsar sang mga estudyante sang UP-Diliman ang “First Day Fight” sadtong Agosto 20 para kundenaron ang madamo nga kapalpakan sang administrasyon sang unibersidad. Ginpamatukan man nila ang pagbuhin sang badyet sa edukasyon kag komersyalisasyon sang mga espasyo kag serbisyo sa unibersidad. Ginsikway nila ang pagpasilabot sang pulis kag militar sa mga kampus sini. Ginlunsar man ang kasubong nga mga protesta sa iban pa nga kampus sang UP sa Baguio, Manila, Laguna, Davao, Cebu kag Iloilo sining nagligad nga mga semana.