Saan nga agsarday ti militar a panagari ti 74th IB iti adu nga ili ti Northern Samar. Agsusumbangir a kaso ti panaglabsing iti karbengan-tao ti agtultuloy a maimalmaldit ditoy kadagiti napalabas a lawas.

Idiay Palapag, kinemmeg ken pinapatay ti 74th IB ni Ryan Arnesto iti Sityo Canonghan, Barangay Osmeña bayat nga adda iti koprasan idi Hulyo 8. Nalulo iti bugbog ken dandani saan a mabigbig ti bangkay ni Arnesto gapu iti limteg ken iwa ti kutsilyo iti rupa, kadagiti takiag ken gurong na. Adda met tama ti bala iti tengnged, iti baba ti barukong ken iti paset ti bakrang na.

Segun iti saksi, inbaud dagiti soldado ni Arnesto iti puon ti niyog, ginalutan ken ginuyod ti ulo na, sakbay da a pinarakapak ti bala. Arig na ayup a pinarangguyod da ti bangkay na agturong iti kaabay a Barangay Bagacay.

Kagiddan a kinemmeg dagiti soldado ti 74th IB iti nasao a sityo ni Marlo Turbanada, maysa nga agtutubo a mannalon. Inpasidong isuna dagiti soldado iti nakaro a pisikal ken mental a tortyur. Arbitraryo nga inbalud da isuna ken pwersado a pinaggiya da kadagiti operasyon a kombat ti militar.

Iti sabali a paset ti pagilyan, naimaldit dagiti sumagannad a kaso ti panaglabsing:

Panagaresto. Arbitraryo nga inaresto dagiti pwersa ti estado ti dati a kabuklan a kalihim ti Karapatan-Southern Mindanao a ni Jayvee “Jay” Apiag idi Agosto 13 idiay Digos City. Kinasuan da isuna ti napaay a pammapatay (frustrated murder).

Panaglipit. Balbaliw a binutbuteng ken pinangtaan ti NTF-Elcac ti lider-estudyante ken salaknib ti karbengan-tao iti Cavite a ni Paolo Tarra. Paulit-ulit a napanan dagiti ahente da ti balay ti pamilya na idi Agosto 4 ken binutbuteng nga idarum ti kaso a “terorismo.” Pinangtaan da met a dukuten nu saan a sumardeng iti progresibo nga aktibidad.

Demolisyon. Idiay Tarlac City, innem a balay dagiti mannalon iti Barangay Central, sakop ti Hacienda Luisita, ti rinebba dagiti tauhan ti naawagan a “Luisita warlord trio” idi Agosto 12. Daytoy a “trio” ket dagiti pamilya a Lorenzo, Cojuangco ken Ayala. Pappapanawen da iti nasao a barangay ti sumurok-kumurang 989 pamilya tapno wayaan ti ₱18 bilyon a proyekto nga Ayala Land Inc. a sumakop iti 290 ektarya a daga ditoy.

Idiay Bataan, saan a bumaba iti 26 a pamilya dagiti mannalon ti napadisi iti demolisyon iti Sityo Kabilang Ilog, Barangay Capunitan, Orion idi Agosto 12. Ti komunidad, a nakasango iti Manila Bay, ket bumangbangon pay laeng manipud iti epekto ti oil spill ken ti nabiit pay a bagyo Carina ken panagtudo nga intunda ti habagat. Napatalaw da para iti plano a negosyo a maitakder iti lugar.

Idiay Masbate, iligal a nagpukan ti kaykayo dagiti soldado ti 2nd IB iti komunidad dagiti mannalon iti Hacienda Mortuegue-Larrazabal idi Agosto 4. Ti asyenda ket sakupen dagiti barangay ti Tubog iti Pio V. Cruz ken Tawad iti ili ti Esperanza. Daytoy ket ar-aramaten a taktika ti 2nd IB ken apo’t daga tapno abugen ken pagtalawen dagiti mannalon iti asyenda.