Simple, ngem nabagas ti panagrambak ti New People’s Army (NPA)-Quezon (Apolonio Mendoza Command) iti maika-56 anibersaryo ti Communist Party of the Philippines. Insayangkat da ti istilo a”kapehan” (panagiistorya bayat nga agkapkape) iti pananglagip iti maysa a larangan iti South Quezon-Bondoc Peninsula (SQBP).

Iti programa, pinadayawan ti yunit dagiti martir ti Quezon iti napalabas a tawen. Nangted ti pablaak ti pannakikaykaysa dagiti bisita a dimmar-ay a nagtaud kadagiti alyado a timpuyog ti National Democratic Front of the Philippines (NDFP) kas ti Kabataang Makabayan ken Artista at Manunulat ng Sambayanan.

Sakbay pay ti Kapehan ket nagbasa ken nagadal ti Nalabbaga a hukbo ti pablaak ti Komite Sentral ken mensahe ti Kalihiman ti Komiteng Tagapagpaganap ti Komite ti Rehiyon ti Partido iti Southern Tagalog para iti anibersaryo ti Partido. Pinasingkedan dagiti pablaak ken mensahe ti panawagan nga “Agilinteg ken Umabante!” nga isu met laeng a tema ti Kapehan.

Paset met ti selebrasyon ti simple a pagsasangwan a makmakan, panagbibingay ti kapadasan iti napalabas a tawen, panagburda, panagdrowing, panagkanta ken panagbasa ti sumagmamano a libro a Marxista-Leninista-Maoista.