Kaniwas iti dawdawaten a hustisya ti umili a Pilipino, agbunto-buntog tatta ni Marcos iti panangiduron iti impeachment wenno panangusig iti Kongreso ken Vice President Sara Duterte, ken panangpaaresto kenni dati a presidente Rodrigo Duterte tapno sumango iti International Criminal Court. Daytoy ket iti laksid dagiti agik-ikkis nga ebidensya ti nakaro a korapsyon ni Sara, ken dagiti krimen ni Rodrigo laban iti sangkataw-an.

Sursuroten ni Marcos ti balakad ti amo na nga imperyalista a US a pagnadnaden ti pannakidinnungpar na kadagiti Duterte tapno saan a maalarma dagiti gangannaet a monopolyo kapitalista nga agpupuonan iti pagilyan. Imbes a denggen ti pukkaw ti umili para iti hustisya, un-unaen ni Marcos ti konsolidasyon iti poder na tapno in-inot a maikkatan dagiti Duterte ti bileg ken impluwensya. Kabilang kadagitoy nga addang ti maar-aramid a “loyalty check” ken panagbalasa dagiti upisyal ti AFP ken PNP ken reorganisasyon ti National Security Council.

Ultimo a panggep ni Marcos a pairuten ti kontrol na iti bileg iti pulitika tapno aywanan ti bukod na a burukrata-kapitalista nga interes. Maysa a kangrunaan a pakakumikoman tatta ni Marcos ket ti umadani nga eleksyon inton Mayo. Ar-aramaten na ti amin a pigsa ti estado ken pondo ti publiko tapno siguraduen a makontrol dagiti alipures na ti Senado, Kongreso ken dagiti lokal a gubyerno. Ti konsolidasyon ti poder ni Marcos ket ar-aramaten na laban iti umili ken laban kadagiti karibal na iti pulitika.

Iti gandat a lemmesen ti pukkaw ti umili para iti hustisya ken kigtoten dagiti kongresista ken grupo a mangidurduron ti impeachment, gimmastos dagiti maka-Duterte a lider ti Iglesia ni Cristo ti ginasut a milyon a piso tapno urnongen ti milyon a kameng daytoy kadagiti rali idi napalabas a lawas. Inaramatda ti manangallilaw a tema a “panagkaykaysa ken kapya” tapno gabburan ti dawdawaten ti umili a hustiya ken pukkaw tapno pagsungbaten ti kagurgura da nga agama a Duterte.

Nasurok makabulanen ti napalabas manipud iti agsasaruno a naiyuli a tallo a kaso ti impeachment iti Kongreso. Ngem iti kumpas ni Marcos, a nagkuna a ti impeachment ket “panagsayang laeng iti panawen” ken “saan pay a napapanawen,” awan pay uray maysa kadagitoy ti narugian a naiproseso. Parparwaren ti dadduma nga ur-urayen ni Marcos a masigurado nga iggem na ti mayorya iti Senado tapno sigurado a makedngan ni Sara Duterte. Ti agpayso, agintutuleng ni Marcos iti pukkaw ti umili ken laplapdan ken idisdiskaril na ti inisyatiba ti nadumaduma a demokratiko a sektor a pagsungbaten ni Sara Duterte ken amana a ni Rodrigo.

Ti panangitantan ni Marcos iti kaso iti panangpadisi ken Sara Duterte ket ad-adda a mangsungsungrod iti pungtot ti umili a Pilipino. Saan da a mairusok a makita nga agtultuloy nga agparayag ti bise presidente a dadaulo iti naanomalya a pananggastar iti ginasut a milyon a piso a kwarta ti umili. Ken ad-adda a saanda a mairusok a ti binilyon a piso a badyet ti reaksyunaryo a gubyerno a nagtaud iti binayadan a buwis ti kadawyan nga umili ket ibulbulsa dagiti kunniber nga upisyal ti gubyerno, iti panangiyuna ti burukrata-kapitalista a ni Marcos.

Ad-adda nga umun-uneg ti pungtot ti umili a Pilipino iti sango ti kumarkaro a krisis iti pagbiagan, nangruna iti agsasaruno a panagngato ti presyo ti taraon, langis ken nadumaduma a gagatangen kadagiti umuna a lawas ti 2025. Agtultuloy nga agintutuleng ni Marcos iti pukkaw dagiti mangmangged ken kadawyan nga empleyado nga ingato ti tangdan ken sweldo, a palalo a kurang tapno mabiag a disente dagiti pamilya a Pilipino.

Awan ti solusyon ti rehimen Marcos iti nakaro a problema ti nasaknap a disempleyo, ken baybay-an na laeng ti tattao a makaammo nga agsapul ti pagbiagan da. Nakarkaro pay, mapapaidaman ti pagsapulan ti minilyon a mannalon, mangngalap, dagiti drayber ti dyip ken dadduma pay a sektor iti sango ti gandat dagiti burges-kumprador ken kakunsabos da a gangannaet a kumpanya ken bangko nga agawen ti daga ken pagbiagan da.

Iti sango ti nasaknap a panagsagaba ken pannakatennag ti pagbiagan ti umili, kumarkaro a panangikuspil ti sungbat ti rehimen Marcos iti gandat nga apputen dagiti arungaing da. Agtultuloy nga umad-ado ti kaso ti panag-espiya, pananglipit kadagiti organisasyon, panangidarum iti pinarbo a kaso, panag-aresto, tortyur ken ekstra-hudisyal a pammapatay laban iti kadawyan nga umili nga agkaykaysa tapno ilaban ti interes ken pagimbagan da. Todo-todo ti panagaramat tatta ni Marcos kadagiti linteg a “kontra-terorismo” para iti pananglapped kadagiti karbengan. Nakarkaro ti sitwasyon iti kaaw-awayan nu sadinno nga agdadata a linteg militar ti ipatpatawda iti rinibo a barangay a konkontrolen ken pagar-arian dagiti pasista a soldado.

Tapno iyabante ti pagimbagan ken karbengan ti masa a Pilipino, kasapulan a napinget a reppeten ti intar da ken ikkan ti bileg ti pungtot da kadagiti krimen ken basbasol dagiti Duterte, ken iti agtultuloy a burukrata-kapitalista ken pasista a panagari iti sidong ni Marcos. Ad-adda pay a papigsaen ti nalawa a nagkaykaysa a prente tapno urnongen ti amin a sektor, organisasyon ken dagiti indibidwal iti panawagan a pagsungbaten dagiti Duterte. Nasken a buklen ti nadumaduma a langa ti timpuyog ken dagiti alyansa, pormal man wenno saan a pormal, tapno maawis ti kalawaan a masa a dumar-ay iti nadumaduma a langa ti tignay ken panangiyebkas ti arungaing.

Rumbeng a mapangngeddeng nga iyabante ti demokratiko a tignay masa tapno pagsungbaten dagiti Duterte ken papigsaen ti laban iti panangsingir kadagiti Marcos ken iti kabuklan a burukrata-kapitalista a sistema. Nakasaysayaat ti sitwasyon tapno riingen ti masa ken napaspas a palawaen ti organisasyon da. Nadam-eg ti daga tapno aduan a pagtubuen dagiti unyon ken timpuyog ti masa agpada iti kasyudadan ken kaaw-awayan.

Gammatan ti nakasaysayaat a sitwasyon tapno iyabante dagiti pang-ekonomya ken pangpulitika a laban ti masa ken aggun-od kadagiti balligi kadagiti dangadang da. Kasapulan nga isilpo dagitoy iti panaglaban iti rehimen US-Marcos ken iti panangiyabante iti nailyan-demokratiko a tignay.

Nasken a sipipinget nga agtignay ken ad-adda pay nga agpakatibker dagiti kadre ken kameng ti Partido tapno agserbi a bugas kadagiti panaglaban ti masa. Isuda ti silaw ken tarabay iti panagabante ti masa iti narigat a dana ti panaglaban. Rumbeng a buklen dagiti limed nga organisasyon ti masa a direkta a sumupsuporta iti panangiyabante ti armado a dangadang, ken mangririing iti masa nga agkameng iti New People’s Army.