Disbar Duterte! Nagidatag ti reklamo a disbarment wenno panangikkat kas abugado laban ken dati a pangulo Rodrigo Duterte iti Korte idi Enero 17. Kabilang iti 17 a nagiyuli ti reklamo da Atty. VJ Topacio, anak ti napapatay nga agassawa a rebolusyonaryo a da Eugenia Magpantay ken Agaton Topacio, ni Liezel Asuncion, asawa ti lider-aktibista a napapatay a ni Manny Asuncion ken Llore Pasco, ina ti dua a napaptay iti “gera kontra droga.”

Panagngato ti matrikula iti UST ken NTC, nasupyat. Nagprotesta dagiti estudyante ti University of Sto. Tomas (UST) iti kampus daytoy idiay Manila idi Enero 14 tapno babalawen ti tuition and other fees increase (TOFI) iti unibersidad. Ti tignay ket indauluan ti nailyan-demokratiko a grupo iti uneg ti UST. Idi napalabas nga akademiko a tawen iti UST, bimmaut iti 6% ti panagngato iti matrikula, ken para iti akademiko a tawen ti 2023-2024 ket sumangsango dagiti estudyante iti panagngato a dumanon iti 4%-10% depende iti kolehiyo.

Iti National Teachers College idiay Manila, nasurok 100 estudyante ti nagpirma iti petisyon nga indauluan ti Ayokong Magmahal NTC tapno supyaten ti nakalayat a TOFI. Ti aktibidad ket naiyaramid kagiddan ti “konsultasyon” idi Enero 16 kanaig iti gakat a panagngato ti matrikula ti NTC.

Plano a panagngato ti plete iti LRT, nababalaw. Sinabat ti protesta dagiti agtutubo ken estudyante ti umuna a byahe ti LRT-1 Doroteo Jose Station iti Sta. Cruz, Manila idi bigat ti Enero 15. Sinupyat da ti plano a ₱15 maksimum a panagngato ti plete nga idurduron ti Light Rail Manila Corporation, ti kumpanya a mangpatpataray iti serbisyo ti LRT iti Metro Manila. Idi Enero 9, dimmar-ay dagiti mangibagi kadagiti progresibo nga organisasyon iti pangpubliko a panagdengngeg kanaig iti panagngato ti plete nga inyaramid ti Department of Transportation. Inyebkas da ditoy ti nainget a panagsupyat da.

Welga iti Handyman. Nagikasa ti welga idi Enero 6 dagiti mangmangged ti Handyman-True Value-Pet Lovers Empowered Workers Union iti kangrunaan a depot ti Handyman iti Manila Bay Spinning Mills Compound idiay Marikina City, Naiduron da nga umakar ken itakder ti piket iti hedkwarters ti Robinsons Retail Holdings Inc. (RRHI) nga agtagikua iti Handyman iti Quezon City gapu iti iligal a panangduprak iti welga da. Sungbat daytoy ti unyon iti iligal a panagikkat iti saan a bumaba iti 122 mangmangged idi Nobyembre 2024. Inikkat isuda ti RRHI gapu iti panangitandudo iti unyon da.