Sa umaabot nga mga bulan ug katuigan, kinahanglan nga hugtanon ug sistematiko natong palapdon ug palig-onon ang Bagong Hukbong Bayan (BHB) isip armas sa katawhang Pilipino sa pagbatok sa pasistang paghari sa rehimeng US-Marcos. Atubangan sa nagkagrabeng pagpanglupig sa katawhan, naggrabeng pagpanumpo sa pulitika, ug nagkagamay nga luna alang sa demokratikong pagpadayag ug paglihok, nagkadako ang panginahanglan nga hawanan ang dalan alang sa armadong pakigbisog.

Gipahamtang ni Marcos ang dili deklaradong balaod militar sa liboan ka mga baryo sa tibuok nasud aron pukanon ang pagsukol sa katawhang nanalipud sa ilang kinabuhi ug panginabuhian. Gihatagag dalan sa mga armadong tropa ni Marcos ang makawkawon ug magun-ubong mga operasyong kumprador sa mga korporasyon sa mina ug mga plantasyon. Nagkadaghan ang mga kaso sa pagpamatay, pagpanghulga, iligal nga pag-aresto ug pagpriso sa mga mag-uuma ug minorya nga mibarog ug misukol.

Bisan sa kasyudaran, walay hunong ang pagpaniid ug pagpangharas sa katawhan nga organisadong nanalipud sa ilang kaayuhan. Gipuntirya ni Marcos, ilabina, ang mga mamumuo, semi-proletaryado, mga batan-ong-estudyante ug uban pang sektor nga nagkahiusa sa katuyoang iasdang ang mga demokratikong pangayo. Gisampungan ang ilang mga baba aron pahinayon ang ilang mga singgit alang sa mas taas nga suhulan, mas ubos nga presyo, desenteng trabaho, igong badyet alang sa edukasyon ug mga katilingbanong serbisyo.

Sa milabayng kapin sa pito ka tuig, gatusan ka bilyong pondo sa katawhan ang gibubo ug giusik-usikan sa reaksyunaryong estado sa gubat aron sumpuon ang pakigbisog sa katawhan alang sa nasudnong demokrasya. Dautang laraw niining pukanon ang BHB isip hinagiban sa demokratikong gahum sa katawhan, ug pagkahuman, targeton ug sumpuon ang organisadong han-ay sa katawhan. Pinakatumong niini mao ang makapatuyang sa paghari ang reaksyunaryong gahum sa nasud, ug gawasnong makapangawat og bahandi ug makapahimulos ang mga imperyalista, dagkung burgesya-kumprador, ug dagkung agalong yutaan.

Tungod sa mga internal nga kasaypanan nga gibunga sa mga kahuyangan sa pag-atubang sa todong-atake sa kaaway, nakasinati or seryosong kadaut ang lain-laing mga yunit sa BHB. Tukma sa panahon nga gipanawagan sa Partido ang usa ka kalihukang pagtul-id niadtong katapusan sa 2023 aron tul-iron ang nangaging mga sayop sa paglunsad sa rebolusyonaryong kalihukan, lakip na ang lain-laing mga aspeto sa gubat sa katawhan, aron ibalik ang hukbong bayan gikan sa pag-atras ngadto sa bag-ong pag-abante.

Sa giya ug inspirasyon sa kalihukanng pagtul-id, naningkamot ang mga Pulang manggugubat sa BHB sa pagpaasdang sa malungtarong gubat sa katawhan. Pakyas ang deklaradong tumong sa rehimeng US-Marcos nga dugmukon ang armadong rebolusyon sa katapusan sa miaging tuig. Ang BHB nagpadayon karon sa pagpalapad ug pagpalalum sa baseng masa, sa pagpalig-on sa anti-pyudal ug anti-pasista nga pakigbisog sa katawhan, ug sa paglunsad sa mga taktikal nga opensiba batok sa mga notoryus nga pasistang elemento ni Marcos.

Sa pagpatuman sa kalihukang pagtul-id, kinahanglang hugot nga huptan sa tanang kadre ug rebolusyonaryong pwersa ang armadong pakigbisog isip nag-unang porma sa pakigbisog, samtang segundaryo ang dayag nga kalihukang masa ug uban pang mga porma sa pakigbisog, sa pagtuman sa sentral nga tahas sa pagpukan sa neokolonyal nga estado sa mga burgesya-kumprador ug mga agalong yutaan. Kinahanglang palig-onon sa tanang myembro sa Partido ang kaandam sa paggunit og armas ug mosalmot sa armadong pakigbisog.

Kinahanglang aktibong motampo ang mga rebolusyonaryong pwersa sa kasyudaran sa kumprehensibong pag-abante sa armadong pakigbisog sa kabukiran. Atong hawanan ang halapad nga dalan alang sa pagmartsa sa labing daghang mamumuo, semi-proletaryado, ug petiburgesya nga intelektuwal gikan sa kasyudaran o bisan sa gawas sa nasud, ngadto sa dalan sa armadong pakigbisog. Kinahanglan sa BHB og mga kadre sa mga mamumuo ug mga intelektuwal nga magsilbing mga Pulang manggugubat, mga kumander, ug mga upisyal sa pulitika sa BHB, samtang kini nagsubay sa dalan sa subling pag-abante.

Aron makab-ot kini, kinahanglang subsub nga palapdon ug palig-onon ang kalihukang masa sa kasyudaran, iasdang ang pakigbisog sa masa, palapdon ang mga organisasyong masa, lakip na ang tago nga mga organisasyong masa, ug ipataas ang rebolusyonaryong kahimatngon sa mga rebolusyonaryong pwersa sa kasyudaran.

Sa mando sa Partido, abli sa tibuok tuig ang mga ganghaan sa hukbong bayan alang sa integrasyon ug rekrutment, gawas pa sa mga anibersaryo sa Partido, BHB, o NDFP. Ang mga yunit sa BHB andam nga modawat og mga grupo sa mga aktibista ug mga kadre gikan sa kasyudaran aron makigsandurot sa mga Pulang manggugubat, moagi sa mga pagbansay sa pulitiko-militar, moapil sa mga pagtuon, produksyon, o mga kulturanhong aktibidad, moalagad sa masang mag-uuma, mahimong mga dentista, medik, o mga magtutudlo sa masa, moapil sa kampanya batok sa pyudalismo, ug motampo sa pagtukod sa Pulang gahum sa demokratikong gubyerno sa katawhan.

Sama nga ang mga sanga ug mga seksyon sa Partido sa kabukiran adunay mga plano, ang mga komite ug mga sanga sa Partido ug mga rebolusyonaryong organisasyong masa sa kasyudaran ug kabaryuhan kinahanglang maghimo og usa ka tuig nga plano aron mapwesto ang programa alang sa grupo-grupo nga integrasyon o pagsampa sa hukbong bayan.

Ipadayon ang kampanya sa pagtuon mahitungod sa armadong pakigbisog isip nag-unang hinagiban sa pagsukol ug mahitungod sa disiplina sa BHB. Ipakaylap ang pagtuon sa nagpadayon nga kasaysayan sa armadong pagsukol sa katawhang Pilipino alang sa nasudnong kalingkawasan. Pagkuha og inspirasyon gikan sa mga kinabuhi sa rebolusyonaryong mga bayani, kinsa walay pagduhaduha nga naghalad sa ilang kahibalo ug kinabuhi alang sa katawhan.

Dungan niini, kinahanglang pakusgon ang kampanya sa pagkolekta sa tanang porma sa suporta alang sa hukbong bayan gikan sa pinansyal ug pagkaon ngadto sa mga hinagibang iggugubat, ingonman sa pag-atiman sa mga nagpatambal ug nagpaalim.

Kinahanglang palig-onon ang hunahuna ug lawas sa mga kadre ug aktibista nga makigsandurot o hingpit nga mosampa sa hukbong bayan, ilabina atubangan sa todong pasistang pag-atake sa kaaway. Sumala pa ni Mao, ang rebolusyon dili usa ka kumbira. Apan sa dangpanan sa masa, ang mga Pulang manggugubat busog sa ilang pag-amuma ug pagmahal matag adlaw.