Sa masunod nga bulan kag palaabuton nga tuig, matutom kag sistematiko naton nga pasangkaron kag pabaskugon ang Bagong Hukbong Bayan (BHB) katimbang nga kusog sang pumuluyong Pilipino sa pagbato sa pasista nga paghari sang rehimen US-Marcos. Sa atubang sang palala nga pagpamigos sa katawhan, nagalala man ang pampulitika nga pagpanumpo kag nagagamay nga ligwa para sa demokratiko nga pagpahayag kag paghulag, nagadako ang kakinahanglanon nga hawanan ang banas sang armadong paghimakas.

Ginpatuman ni Marcos ang indi deklarado nga laye militar sa linibo ka mga baryo sa bilog nga pungsod agud tapnaon ang pagbato sang masa nga nagapangapin sang ila kabuhi kag palangabuhian. Ginahatagan-ligwa sang mga armadong tropa ni Marcos ang makawat kag mapangwasak nga operasyon komprador sang mga korporasyon sa pagmina kag mga plantasyon. Wala-tuo ang mga kaso sang pagpatay, pagpangsita, iligal nga pag-aresto kag pagbilanggo batuk sa masang mangunguma kag minorya nga nagapanindugan kag nagabato.

Mangin sa kasyudaran, wala puas ang pagpanilag kag pagpang-ipit sa pumuluyo nga organisado nga nagapangapin sa ila kaayuhan. Ginapunterya ni Marcos, ilabi na, ang mga mamumugon, mga mala-mamumugon, mga kabataan-estudyante kag iban pa nga sektor nga naga-isa sa katuyuan nga isulong ang mga demokratiko nga demanda. Ginabusalan sila agud punggan ang ila singgit para pataason ang sweldo, panubuon ang presyo, disente nga trabaho, nagakaigo nga badyet para sa edukasyon kag mga serbisyon pangkatilingban.

Sa nagligad nga masobra na pito ka tuig, ginatos ka bilyon piso nga pondo sang katawhan ang ginbubo kag gin-usikan sang reaksyunaryo nga estado sa gyera sang pagsumpo sa paghimakas sang pumuluyo para sa pungsodnon nga demokrasya. Dumot nga tuyo sini nga perdihon ang BHB isip hinganiban sang demokratiko nga gahum sang pumuluyo, kag pagkatapos, punteryahon kag sumpuon ang organisado nga kubay sang pumuluyo. Pinakakatuyuan sini nga wala-sablag nga maghari ang reaksyunaryo nga gahum sa pungsod, kag wala-pugong nga makamol sang manggad sa pagpangawat kag pagpanghimulos ang mga imperyalista, dalagko nga burgesya komprador kag dalagko nga agalon mayduta.

Bunga sang internal nga mga pagsayop nga kabangdanan sang nangin mga kahuyangan sa pag-atubang sa todo-atake sang kaaway, nag-agum sang seryoso nga kahalitan ang nagkalain-lain nga mga yunit sang BHB. Yara sa husto nga tion nga ipanawagan sang Partido ang kahublagan panadlong sadtong katapusan sang 2023 agud tadlungon ang nagligad nga mga pagsayop sa pagsulong sang rebolusyonaryong kahublagan, kabahin ang nagkalain-lain nga aspeto sang inaway banwa, agud pahinayon ang hangaway sang banwa halin sa pag-atras padulong sa liwat nga pag-abante.

Sa giya kag inspirasyon sang kahublagan panadlong, nagamadinalag-on ang mga Pulang hangaway sang BHB sa pagsulong sang pangmalawigon inaway banwa. Paslaw ang deklarado nga katuyuan sang rehimen US-Marcos nga dugmukon ang armado nga rebolusyon sa katapusan sang nagligad nga tuig. Padayon subong ang BHB sa pagpalapad kag pagpadalom sang baseng masa, sa pagpabaskog sang mga paghimakas masa anti-pyudal kag anti-pasista, kag sa paglunsar sang mga taktikal nga opensiba batuk sa mga haraskal nga pasistang tinawo ni Marcos.

Sa pagsulong sang kahublagan panadlong, dapat hugot nga uyatan sang tanan nga kadre kag rebolusyonaryong pwersa ang armadong paghimakas isip nagapanguna nga porma sang paghimakas, samtang sekundaryo ang dayag nga kahublagan masa kag iban nga porma sang paghimakas, sa pagtuman sang sentral nga katungdanan nga idagdag ang neokolonyal nga estado sang mga burges komprador kag agalon mayduta. Dapat palig-unon sang tanan nga katapo sang Partido ang kahandaon nga mag-uyat sang armas kag mag-intra sa armado nga paghimakas. Dapat maukod nga mag-amot ang mga rebolusyonaryong pwersa sa kasyudaran sa kumprehensibo nga pagsulong sang armado nga paghimakas sa kabukiran. Hawanan naton ang malapad nga banas para sa pagmartsa sang wala tupong nga kadamuon sang mga mamumugon, mala-mamumugon kag petiburges nga intelektwal halin sa kasyudaran ukon mangin sa luwas sang pungsod, padulong sa dalan sang armado nga paghimakas. Kinahanglan sang BHB sang mga kadre nga mamumugon kag intelektwal agud mag-alagad nga mga Pulang hangaway, kumander kag upisyal sa pulitika sang BHB, samtang gina-usoy sini ang banas sang liwat nga pagsulong.

Agud malab-ot ini, kinahanglan matutom nga pasangkaron kag pabaskugon ang kahublagan masa sa kasyudaran, isulong ang mga paghimakas masa, pabaskugon ang mga organisasyon masa kag pataason ang rebolusyonaryo nga kamuklatan sang mga rebolusyonaryong pwersa sa kasyudaran.

Sa mando sang Partido, bilog tuig nga ginabuksan ang pwertahan para sa integrasyon kag rekrutment sa hangaway sang banwa, magluwas pa sa tion sang mga anibersaryo sang Partido, BHB ukon NDFP. Ang mga yunit sang BHB ang andam nga magbaton sang grupo-grupo nga mga aktibista kag kadre halin sa kasyudaran para mag-upod pangabuhi sa mga Pulang hangaway, magpaidalom sa mga paghanas sa pulitiko-militar, magtambong sa mga pagtuon, produksyon ukon mga pangkultura nga aktibidad, mag-alagad sa masang mangunguma, mangin dentista, medik ukon manunudlo sang masa, makig-ugyon sa kampanya antipyudal, kag magbulig sa pagpundar sang Pulang gahum sang demokratikong gubyerno sang banwa.

Kasubong nga may plano ang mga sanga kag seksyon sang Partido sa kabukiran, dapat magdihon ang mga komite kag sanga sang Partido kag rebolusyonaryong organisasyon masa sa kasyudaran kag kabanwahanan sang isa ka tuig nga plano para tadlungon ang programa sa grupo-grupo nga integrasyon ukon pagpatapo sa hangaway sang banwa.

Ilunsar ang kampanya sang pagtuon bahin sa armadong paghimakas isip nagapanguna nga hinganiban sang pagbato kag bahin sa disiplina sang BHB. Palapnagon ang pagtuon sa nagapadayon nga maragtas sang armadong pagbato sang pumuluyong Pilipino para sa pungsodnon nga kahilwayan. Magkuha sang inspirasyon sa kabuhi sang mga rebolusyonaryong baganihan, nga wala-kataka nga naghalad sang ila nga kinaalam kag kabuhi sa katawhan.

Kadungan sini, dapat pabaskugon ang kampanya sang pagkalap sang tanan nga porma sang suporta para sa hangaway sang banwa, halin sa pinansya kag pagkaon, tubtob sa mga armas pang-away, pati na sa pag-atipan sa mga nagapabulong kag nagapa-ayo.

Kinahanglan pabakuron ang pinsar kag lawas sang mga kadre kag aktibista nga makigbagay ukon lubos nga magapatapo sa hangaway sang banwa, ilabi na sa atubang sang todo pasista nga atake sang kaaway. Tugda gani ni Mao, indi kinan-anay ang rebolusyon. Apang sa puluy-an sang masa, adlaw-adlaw nga busog ang mga Pulang hangaway sa pag-atipan kag pagpalangga sang masa.