Ha masunod nga mga bulan ngan tiarabot nga tuig, pursigido ngan sistematiko naton nga pahiluagon ngan pakusgon an Bagong Hukbong Bayan (BHB) komo armas han katawhan Pilipino ha pag-ato ha pasista nga paghahadi han rehimen US-Marcos. Atubangan han natikagrabe nga pananalumpigos ha katawhan, natikapintas nga pampulitika nga panmuypoy ngan natikahaligot nga lugway para ha demokratiko nga pagpapahayag ngan paggios, nagtitikadako an panginahanglan nga hawanan an dalan han armado nga pakig-away.

Igin-imponer ni Marcos an diri deklarado nga balaud militar ha yukot nga mga baryo ha bug-os nga nasud agud puuhon an pag-ato han masa nga nagdedepensa ha ira kinabuhi ngan pakabuhi. Ginhahagudalan han mga armado nga tropa ni Marcos an mapandambong ngan mapanhibang nga kumprador nga operasyon han mga korporasyon ha mina ngan mga plantasyon. Wala-tuo an mga kaso han panmatay, pananarhug, iligal nga pag-aresto ngan panmriso kontra ha masa nga parag-uma ngan minoriya nga naninindugan ngan naato.

Bisan ha kasyudaran, waray hunong an sarbeylans ngan pan-gigipit ha katawhan nga organisado nga nagdedepensa ha ira kaupayan. Ginpupuntirya ni Marcos, labina, an mga trabahador, mga baga-trabahador, mga kabatan-unan-estudyante ngan iba pa nga sektor nga nagkakaurusa ha katuyuanan nga ipasulong an mga demokratiko nga ungara. Ginpapamingaw hira para puypuyon an ira guliat agud pahitas-on an sweldo, pahimub-on an presyo, disente nga trabaho, sadang nga badyet ha edukasyon ngan mga pankatilingban nga serbisyo.

Ha naglabay na nga masobra pito katuig, gatus-gatos kabilyon kapisos nga pondo han katawhan an ginbuhos ngan ginmalgastar han reaksyunaryo nga estado ha gerra han panmuypoy ha pakig-away han katawhan para ha nasyunal nga demokrasya. Maraut nga larang hini an perdihon an BHB komo armas han demokratiko nga poder han katawhan, ngan kahuman, puntiryahon ngan puypuyon an organisado nga ranggo han katawhan. Ultimo nga katuyuanan hini an waray ulang nga makaghadi an reaksyunaryo nga poder ha nasud, ngan waray ulang nga makaghakin hin karikuhan ha pandambong ngan paniniyupi an mga imperyalista, dagko nga burgesya komprador ngan dagko nga agaron maytuna.

Bunga han pansakob nga mga pagsasayop nga hinungdan han nagin mga kaluyahan ha pag-atubang ha todo nga atake han kaaway, nahiagum hin seryoso nga kahibangan an magkalain-lain nga yunit han BHB. Napapanahon nga ginpanawagan han Partido an kagiusan nga pagtutul-id hadton katapusan han 2023 agud itul-id an naglabay nga mga pagsasayop ha pagpasulong han rebolusyunaryo nga kagiusan, kalakip an dirudilain nga aspeto han gerra han katawhan, agud ibirik an hukbo han katawhan tikang ha pag-atras ngadto ha utro nga pag-abante.

Ha giya ngan inspirasyon han kagiusan nga pagtutul-id, nagpupursige an mga Pula nga mangaraway han BHB ha pagpasulong han panmaihaan nga gerra han katawhan. Pakyas an deklarado nga katuyuanan han rehimen US-Marcos nga rumkon an armado nga rebolusyon ha katapusan han naglabay nga tuig. Padayon yana an BHB ha pagpahiluag ngan pagpahilarum han base panmasa, ha pagpakusog han mga kontrapyudal ngan kontrapasista nga mga panmasa nga pakigbisog, ngan ha paglansar hin mga taktikal nga opensiba kontra ha mga lanong nga pasista nga tawuhan ni Marcos.

Ha pagpasulong han kagiusan nga pagtutul-id, kinahanglan mahugot nga pankatinan han ngatanan nga kadre ngan rebolusyunaryo nga pwersa an armado nga pakig-away komo prinsipal nga porma han pakigbisog, samtang segundaryo an dayag nga kagiusan masa ngan iba nga porma han pakigbisog, ha pagpatuman han sentral nga buruhaton nga ibagsak an bagakolonyal nga estado han mga burges komprador ngan agaron maytuna. Kinahanglan padig-unon han ngatanan nga kaapi han Partido an kaandaman nga kumatin hin armas ngan umapi ha armado nga pakig-away.

Kinahanglan pursigido nga mag-amot an mga rebolusyunaryo nga pwersa ha kasyudaran ha kumprehensibo nga pag-abante han armado nga pakig-away ha kabaryuhan. Hawanan naton an hiluag nga dalan para ha pagmartsa han waray kapareho nga ihap han mga trabahador, baga-trabahador, ngan petiburges nga intelektwal tikang ha kasyudaran o bisan ha langyaw nga labnasan, ngadto ha dalan han armado nga pakig-away. Kinahanglan han BHB hin mga kadre nga trabahador ngan intelektwal para magserbe nga mga Pula nga mangaraway, kumander ngan upisyal ha pulitika han BHB, samtang ginhahasog hini an dalan han utro nga pag-abante.

Para makab-ot ini, kinahanglan pursigido nga pahiluagon ngan pakusgon an kagiusan masa ha kasyudaran, ipasulong an mga panmasa nga pakigbisog, pakusgon an mga panmasa nga organisasyon kaupod an mga sikreto nga organisasyon masa ngan pahitas-on an rebolusyunaryo nga kapukawan han mga rebolusyunaryo nga pwersa ha kasyudaran.

Ha mando han Partido, bug-os nga tuig nga gin-aabre an mga integrasyon ngan pagrekrut ha hukbo han katawhan, labot pa ha kada mga anibersaryo han Partido, BHB ngan NDFP. Andam an mga yunit han BHB nga kumarawat hin grupo-grupo han mga aktibista ngan kadre tikang ha kasyudaran agud mag-integreyt ha mga Pula nga mangaraway, magpailarum ha mga pagpahiara ha pulitiko-militar, magpartisipar ha mga pag-aram, produksyon o pankultura nga aktibidad, magserbe ha masa nga parag-uma, magin dentista, medik o magturutdo han masa, makig-usa ha kontrapyudal nga kampanya, ngan mag-amot ha pagpundar han Pula nga poder han demokratiko nga gubyerno han katawhan.

Sugad nga mayda plano an mga sanga ngan seksyon han Partido ha kabaryuhan, kinahanglan magbug-os an mga komite ngan sanga han Partido ngan rebolusyunaryo nga panmasa nga organisasyon ha kasyudaran ngan poblasyon hin usa katuig nga plano agud aydon an grupo-grupo nga integrasyon o pag-api ha BHB.

Himuon an kampanya han pag-aram hiunong ha armado nga pakig-away komo prinsipal nga armas ha pag-ato ngan hiunong ha disiplina han BHB. Ipasamwak an pag-aram ha nagpapadayon nga kasaysayan han armado nga pag-ato han katawhan Pilipino para ha nasyunal nga katalwasan. Kumuha hin inspirasyon ha estorya han kinabuhi han mga rebolusyunaryo nga bayani, nga waray pagruhaduha nga naghalad han ira kabaltok ngan kinabuhi ha katawhan.

Kadungan hini, kinahanglan pakusgon an kampanya han pagrekawdar han ngatanan nga tipo han suporta para ha BHB, tikang ha pinansya ngan pagkaon ngadto ha hukbo han katawhan, tubtub ha mga higamit ha gerra, hasta na ha pag-ataman ha mga nagpapatambal ngan nagpapahuwas han sakit.

Kinahanglan padig-unon an hunahuna ngan lawas han mga kadre ngan aktibista nga mag-iintegreyt o hul-os nga maapi ha hukbo han katawhan, labina ha atubangan han buylo nga pasista nga pag-atake han kaaway. Sering ngani ni Mao, diri pyesta an rebolusyon. Kundi ha pagpanalipod han masa, kada adlaw kuntento an mga Pula nga mangaraway ha pag-ataman ngan paghigugma han masa.