Dirudiretso an pagsabrag hin terorismo han 87th IB ha mga bungto han Samar. Pinakaurhi nga krimen hini an pagpusil ngan pagpatay han mga berdugo nga sundalo hini ha mag-amay nga parag-uma ha Sto. Niño, Paranas, Samar hadton Pebrero 5. Sugad han iba nga kaso, ginpagawas nira nga mga Pula nga mangaraway han Bagong Hukbong Bayan an duha agud tahuban an ira krimen ngan baratunon ha internasyunal nga makatawo nga balaud.

Tikadto an mag-amay nga hira Renato ngan Reymark Gabac ha ira umhanan alas-8 han aga agud panginanuon an ira karabaw han igkahitapo han mga sundalo. Estorya han mga residente, naalahan han mga sundalo nga mga Pula nga mangaraway an duha kasunod han usa nga agway hadton 4:20 han kaagahon ha hirayo nga parte han tubtuban han Barangay Santo Niño ngan Barangay Maylobe.

Binalik pa la hi Renato ha Samar tikang ha pag-ukoy hin pira kapanahon ha Manila. Ginikan hiya ha isla tungod kay diri nahunong an 87th IB ha panmirit ha iya nga magserbe nga aset-paniktik ha ira barangay kontra ha hukbo han katawhan.

“Waray kaawod nira nga ginhahambog an ira kadaugan bisan kun klaro kaupay ha litrato nga hira mismo an nagkuha nga sundang la an dara han mag-amay,” pahayag han BHB-Western Samar. Ginbaduan pa kunuhay han mga sundalo ngan ginliwnan an sul-ot nga panapton han mag-amay nga sigon ha mga taga-barangay diri asya an ira bado han gumikan ha ira balay.

Hirayo ha lugar han mga Gabac an lugar han agway, sigon ha BHB-Western Samar. Gintuyo nga patayon an duha ha kangalas han mga sundalo tungod ha susrunod nira nga kapakyasan ha serye han pag-atake ngan engkwentro ha mga yunit han BHB ha syahan nga semana han Pebrero.

Ha report han yunit, napakyas an usa kakumpanya han 82nd DRC nga lipulon an usa nga grupo o tim han BHB ha Barangay Calapi, Motiong hadton Pebrebo 1. Sering han BHB-Western Samar, epektibo nga nakagdepensa an mga Pula nga mangaraway diin usa nga opisyal han DRC an napatay samtang talwas nga nakaatras ngan waray kaswalti an tim.

Talwas liwat nga nakaatras an yunit han BHB-Western Samar ha nahitabo nga engkwentro hadton Pebrero 5. Ha kasina ngan kangalas han militar, nagbuhi ini hin 17 nga mortar ha tuyaw nga katuyuanan nga maigo an yunit han BHB.

Diri ini an syahan nga higayon nga ginpurungyutan han 87th IB an mga bungto han Samar. Hadton Septyembre 2023, usa kasemana hini nga ginbomba an mga barangay ha San Nicolas ngan Aguingayan ha San Jose de Buan nga nagdurot hin perwisyo ha mga residente. Kadungan han terorismo an pagdiri ha mga parag-uma nga kumadto ha ira mga umhanan. Bisan an mga eskoylahan napiritan nga magserra tungod hini. Sigon ha mga taghimaryo, mas maupay pa an ira kamutangan kung naatake an mga mananap ngan yatot, tungod kay bisan guti may naaani hira. Kundi kun an 87th IB an umatake, grabe nga kagutom an ira gin-aaguman.

Usa pa nga panmomba an iginreport han mga residente ha Sityo San Pedro, Barangay 3, San Jose de Buan, Samar hadton Hulyo 2024. Bulos-atake ini han militar kahuman mamatayan hin usa nga sundalo ha operasyon haras han BHB-Western Samar. Tungod ha panganyon ngan ha gin-imponer nga restriksyon han militar, kadam-an ha mga parag-uma diri nakakatukad ngadto ha ira mga kaingin. An iba naduso nga mag-ebakwet ha kahadlok nga maigo han mga bomba. Labot ha panganyon, nangangawat liwat hin mga hayop ngan pagkaon an mga sundalo tikang ha mga parag-uma.

Ha kagrabihon han gindurot nga perwisyo han 87th IB, nagkaurusa an mga residente han nasering nga sityo agud ig-insister an pagpaiwas ha mga sundalo nga nagkakampo ha ira lugar.

Nagpaabot hin pagduyog ha kasubo an BHB-Western Samar ha mga kaurupdan han mag-amay nga Gabac ngan iba pa nga biktima han 87th IB. Nagsaad ini nga maabot an panahon nga pagbabaydon han rebolusyunaryo nga kagiusan an kriminal nga 87th IB ha ira makarimadima nga krimen kontra ha katawhan.