Ginsikmit ngan tuyo nga ginpatay han mga sundalo han 62nd IB an parag-uma nga hi Rolito Tanillo ha Barangay Tala-on, La Libertad, Negros Oriental hadton Pebrero 10, alas-7 han gab-i. Sigon ha report, ginkuha hiya han mga sundalo tikang ha iya balay, gindara ha iba nga lugar agud patayon.

Ginpagawas han mga sundalo nga napatay hiya ha engkwentro ha Bagong Hukbong Bayan (BHB). Waray wantas hira nga nagpinabuto para ha buwa nga araway. Nagdurot ini han sobra nga kahadlok ha taghimaryo.

Pira kaadlaw antes an pagpatay, iligal nga nangaresto an 62nd IB han mga sibilyan hadton Enero 29 ngan 31 ha Central Negros.

Ha Barangay Linantuyan, Guihulngan City, Negros Oriental, gin-aresto ha diri klaro nga basaranan an 70-anyos nga hi Naring Remasog. Hasta yana, diri pa maseguro han pamilya kun diin gindara han mga sundalo an biktima ngan kun ano an iya kamutangan.

Ha Barangay Santol, Binalbagan, Negros Occidental, gin-aresto hi Bobet Carillo hadton Enero 29. Ginpaukad han tuna ilarum han iya balay an iya asawa ngan anak agud hanapon kuno didto an gintago nga armas ni Carillo. Labot pa, piniritay nga ginpagiya ha pankombat nga operasyon hi Carillo ha magsarapit nga mga bungto hirani ha Binalbagan.

Hadton Pebrero 18, iginreport han mga residente han Hacienda Tres Hermanos ha Barangay Luna, Cadiz City an pagtambak han mga Scout Ranger tikang ha 79th IB ha ira komunidad. Ginsulod nira an balay han tsirman han asosasyon ngan iginpailarum hiya ha interogasyon.

Pan-gigipit. Ha Cordillera, ginsalawdan hin reklamo nga pagtalapas ha “terrorism financing” an tagapagyakan han Kilusang Mayo Uno-Cordillera nga hi Mike Cabangon. Hadton Pebrero 15, nakakarawat hi Cabangon han usa nga reklamo nga iginsalawad han pulis kontra ha iya para ha duha nga insidente kuno han pagtalapas ha “terrorism financing.”

Hi Cabangon an ika-12 nga progresibo nga indibidwal ha Northern Luzon nga ginsalawdan han hinimu-himo nga reklamo kasumpay han “terrorism financing.”

Ha Iloilo, iginreport han Anakbayan-West Visayas State University (WVSU) an pagkumpronta hini ha usa nga kaapi han Student Intelligence Network (SIN) ha ilarum han Reserve Officer Training Corps (ROTC) nga napostura nga estudyante han unibersidad ngan naniktik ha ira organisasyon. Gin-ako han nasering nga indibidwal an iya ginhimo nga paniniktik kontra ha mga kaapi han Anakbayan-WVSU subay ha mando ha iya ha ROTC.