Iginbuksas han Department of Labor and Employment (DOLE) an pagin maka-kapitalista han magpagwas ini han kamanduan nga “assumption of jurisdiction” o AJ hadton Pebrero 5 ha pakigbisog han mga trabahador ngan unyon ha Nexperia Philippines Inc. Pinaagi han AJ, epektibo nga igindiri han DOLE an plano nga welga nga igin-aandam han mga trabahador ha pangunguna han Nexperia Philippines Inc Workers’ Union-National Federation of Labor Unions-Kilusang Mayo Uno (NPIWU-NAFLU-KMU).

Usa nga kamanduan an AJ nga igin-gagawas han sekretaryo han DOLE ha mga sumpakiay ha pagtrabaho ha mga industriya nga gin-ngaranan hini nga “importante ha nasyunal nga interes.” Otomatiko nga ginpupugngan hini an anuman nga welga o lockout, ngan oobligahon nga ha gilayon bumalik ha trabaho an mga trabahador ngan ipadayon an operasyon han kompaniya. Gamit an AJ, poyde pagiuson han DOLE an mga pulis ngan militar agud puypuyon an mga trabahador nga diri masugot hini nga kamanduan.

Susrunod nga mga piket ngan rali an ginhimo han NPIWU hadin Pebrero agud suknaon an AJ. Guliat nira nga dagmit nga ibasura an AJ ngan batunon han Nexperia an maiha na nga demanda han mga trabahador dinhi. Mahinunumduman nga binoto an mayoriya han mga kaapi han NPIWU-NAFLU-KMU hadton Disyembre 20, 2024 agud ilansar an welga kahuman han usa katuig nga pagdelatar han kompaniya ha negosasyon ngan deadlock ha erestorya para ha bag-o nga collective bargaining agreement (CBA). Pag-ato liwat nira ini ha iligal nga taranggalay ngan pagtanggal ha trabaho ha upat nga upisyal han unyon kaupod an presidente hini hadton Disyembre 17, 2024.

Sigon ha Center for Trade Union and Human Rights (Philippines), talapas an AJ ha katungod han mga trabahador ha pakignegosasyon ha CBA ngan katungod nga magwelga. Mayda na desisyon an International Labour Organization Committee of Experts on the Application of Conventions (ILO CEACR) nga natalapas ha ILO Conventions 87 ngan 98 an AJ ha katungod ha kolektibo nga pakigtawaray ngan katungod nga magwelga.

Kaparte an Nexperia han usa nga multinasyunal nga kompaniya nga naghihimo hin mga semiconductor chip nga gin-gagamit ha mga sarakyan, mga cellphone, ngan iba pa. Kalakip ha mga kliyente hini an Bosch, Continental, Denzo, Huawei, Neltz, Tesla, Xiaomi ngan Samsung.

Ha presente, nakakahimo an Nexperia Philippines hin pito kamilyon nga chip kada adlaw. Kaparte ini han masobra 90 kabilyon nga semiconductor chip nga nahihimo han bug-os nga kompaniya kada tuig. Hadin Pebrero, nagreport an kompaniya hin kabug-usan nga kita nga $12.61 kabilyon para ha 2024.

An Nexperia an hadto anay Phillips Semiconductors, usa ha pinakadako nga kompaniya han semiconductor nga nakabase ha The Netherlands. Iginbaligya ini han mga tag-iya nga Dutch ha mga mamuruhunan nga Amerikano hadton 2016 ngan nagin NXP Semiconductors. Hadton 2017, napalit ini han WingTech, usa nga kompaniya nga Chinese nga may parte nga gintatag-iyahan han estado han China. Mayda ini mayor nga mga upisina ha The Netherlands ngan China.