Agtultuloy ti panangimula ti terorismo ti 87th IB kadagiti ili ti Samar. Kaudian a krimen daytoy ti panangpaltog dagiti berdugo a soldado daytoy iti agama a mannalon iti Sto. Niño, Paranas, Samar idi Pebrero 5. Kapada iti dadduma a kaso, pinaruar da a Nalabaga a mannakigubat ti NPA ti dua tapno kalluban dagiti krimen ken sungsungbatan da iti internasyunal a makatao a linteg.

Agturong dagiti agama da King ken Reymark Abalos iti talon da iti alas-8 ti bigat tapno asikasuen ti nuang da idi masabat dagiti soldado. Inlanad dagiti residente, nagkamalian dagiti soldado a Nalabaga a mannakigubat dagiti dua, kasaruno ti maysa a labanan idi 4:20 ti parbangon iti adayo nga murdong ti Barangay Santo Niño ken Barangay Maylobe.

Kasubsubli laeng ni King iti Samar manipud iti panagtalinaed na ti sumagmamano a panawen iti Manila. Pimmanaw isuna iti isla gapu ta saan a sardengan a pilpiliten ti 87th IB nga agserbi nga aset-paniktik iti barangay kontra iti soldados ti umili.

“Awan babain da nga ipagpanpannakkel ti balligi da uray nakalawlawag iti ladawan nga isuda mismo ti nangala, a buneng laeng ti tugot dagiti agama,” pablaak ti NPA-Western Samar. Sinuktan kano pay dagiti soldado ken sinukatan ti kawes dagiti agama nga basar kadagiti bumaryo ket saan a daydiay ti kawes da idi pimmanaw da iti balay da.

Adayo iti lugar dagiti King iti lugar ti labanan, basar iti NPA-Samar. Inggagara a pinatay dagiti dua iti busor dagiti soldado gapu iti agsasaruno a pannakapaay iti panangraut ken engkwentro kadagiti yunit ti NPA iti umuna nga lawas ti Pebrero.

Iti report ti yunit, napaay ti maysa a kompanya ti 82nd DRC nga pukawen ti maysa nga yunit ti NPA iti Barangay Calapi, Motiong idi Pebrero 1. Kuna ti NPA-Western Samar, epektibo a nakapagdepensa dagiti Nalabaga a mannakigubat no sadino ket maysa nga opisyal ti DRC ti napatay kabayatan a natalged a nakaatras nga awan ti kaswalti ti yunit.

Natalged a nakaatras ti yunit ti NPA-Western Samar iti napasamak nga engkwentro idi Pebrero 5. Iti suron ken pungtot ti militar, nangibulos daytoy ti 17 bala ti mortar ti terorista a panggep a darupen ti maysa a yunit ti NPA. Saan a daytoy ti umuna a gundaway a pinarmek ti 87th IB ti ili ti Samar. Idi Setyembre 2023, maysa a lawas daytoy nga binomba dagiti barangay ti San Nicolas ken Aguingayan iti San Jose de Buan nga nagbunga iti perwisyo iti bumaryo. Kagiddan ti terorismo ti panangiparit kadagiti mannalon nga mapan kadagiti pagtatalonan. Kasta met dagiti eskuelaan ket inkapilitan nga agserra gapu iti daytoy. Basar kadagiti bumaryo, “mas nasaysayaat pay ti kasasaad da no umatake dagiti dudon ken bao, gapu ta uray kaskasano ket adda latta ti maapit mi. Ngem no 87th IB ti rumaut, napalalo a bisin ti mapadasan.”

Maysa pay a panagbomba ti inreport dagiti residente ti Sityo San Pedro, Barangay 3, San Jose de Buan, Samar idi Hunyo 2024. Panagibales a panangraut daytoy ti militar kalpasan a matay ti maysa a soldado ti operasyon a haras ti NPA-Western Samar. Gapu iti panagkanyon ken intinnag nga panangiparit ti militar, kaadduan kadagiti mannalon ket saan a nakapagsukay kadagiti um-uma da. Ti dadduma ket naiduron nga agbakwit iti buteng a matamaan ti bomba. Malaksid iti panagkanyon, nagtakaw pay kadagiti dingnguen ken makan dagiti soldado manipud kadagiti mannalon.

Iti nakaro nga imbunga a perwisyo ti 87th IB, nagtataripnong dagiti residente iti naibaga a sityo tapno irupir ti panangpatalaw kadagiti soldado a nakakampo iti lugar da.

Nangidanon ti pannakipagladingit ti NPA-Western Samar kadagiti kabagian ti agama nga Abalos ken dadduma pay a biktima ti 87th IB. Kari daytoy nga dumteng ti panawen a pagbayaden ti rebolusyonaryo a tignayan ti pasista nga 87th IB kadagiti nakaam-ames a krimen kontra kadagiti umili.