Mahugot nga ginkundena han People Surge, alyansa han mga nakatalwas ha kalamidad, an kawaray-pulos han rehimen Marcos nga tagan-proteksyon an mga bulnerable nga komunidad ha panahon han mga bagyo ngan pag-uran nga dara han shear line. Ginsukna liwat hini an pagpabor han rehimen ha mapanhibang nga mga proyekto ngan operasyon han mina, kwari ngan kumbersyon han tuna nga nagpapagrabe ha mga destroso han pag-apo ngan pag-uran. Igin-insister hini nga kinahanglan tagan hustisya ngan bayad-danyos an mga nakatalwas ha mga kalamidad ngan paundangon an nasering nga mga mapanhibang nga operasyon.

Tikang Enero, bug-os nga mga barangay ha Samar, Davao, mga rehiyon han Camarines, Cagayan ngan iba pa nga mga prubinsya an gin-apo tungod ha maiha ngan makusog nga pag-uran nga dara han shear line. An shear line amo an pagturupo han magkaiba nga kadagmiton, direksyon ngan temperatura han hangin nga nagreresulta ha pag-uran.

Diri pala maiha, gin-apo han uuran an mga barangay ha mga rehiyon ng Calabarzon, Western Visayas ngan Central Visayas, nga nagdurot hin destroso ha 850,000 nga indibidwal. Kalakip ha mga nahibalita an grabe nga pag-apo ha Puerto Princesa City ngan iba pa nga bungto ha Palawan, diin lima an namatay.

Kulang gud an igindistribwer han estado nga ₱65 kamilyon nga bulig itanding ha kadakuon han destroso, sigon ha grupo. Ini nga guti ura-ura nga balor, diri makaakos nga utro nga itindog an mga balay, ibalik an mga nawara nga paninanum, o solbaron an troma (ugmad) nga igindurot ha aton mga komunidad.

Panawagan han alyansa nga magkamayda hin kumprehensibo nga pankalamidad nga plano agud tagan prayoridad an pinakabulnerable nga mga lugar ngan mga programa para ha pakabuhian an mga apektado nga mga komunidad. Kinahanglan liwat papagbatunon an mga lokal ngan nasyunal nga upisyal nga pakyas nga panalipdan an ira katawhan tungod kay an ira pagpasibaya nagpagrabe ha epekto han kalamidad.