Usa kabulan pala tikang han liningkod hi Donald Trump komo presidente han United States of America kundi wala-tuo na an iya ginsungay ngan gin-atake, sugad han usa nga halimaw nga natutuyaw ha pag-angkon han ngatanan para ha iya kahadian. Ha iya mga deklarasyon ngan pitad, ginhukas ni Trump an maskara han US komo “tagapagpasamwak han demokrasya,” ngan ginbubuksas an tinuod nga nawong ngan kolor han US komo waray kabusugan nga imperyalista nga poder nga ludlod ha krisis ngan desperado nga talwason an nagpapapas nga imperyo.

Ha sakob han US, komo espiho han natikahilarum nga krisis ha pulitika ngan pagkusog han pasista, rasista ngan ultra-konserbatibo nga huyob, hiluagan nga gintatamas-tamasan han gubyerno nga Trump an demokratiko nga katungod han katawhan Amerikano. Ha sugo ni Trump, pira kayukot nga empleyado han gubyerno an waray igpahibaro nga gintanggal ha trabaho, ha tahub han “pagtitipid.” Ginpagios niya an mga armado nga ahensya han estado para madarahug nga prisuhon o palayason an milyun-milyon nga mga “iligal” nga migrante ha US.

Ha haros ngatanan nga parte han kalibutan, naatubang an katawhan ngan mga nasud ha mga pan-gigipit ha ekonomiya ngan mga tarhug han agresyon han imperyalismo nga US. Gin-gagamit ni Trump an pag-imponer han taripa ha negosyuhay, pagbawi o pag-ulang han mga ayuda militar ngan pan-ekonomiya, kontra ha mga nasud nga karuyag niya magipit, pasundon o paalagaron ha iya mga dikta.

Nag-imponer hi Trump han kadugangan nga mga taripa kontra ha mga produkto han Canada, Mexico ngan China ha pag-atentar nga mapugos ini nga ihatag an iya karuyag. Kadungan hini, gindeklara ni Trump an iya karuyagon nga ipailarum an Canada komo ika-51 nga estado han US. Gin-anunsyo liwat niya an plano nga kuhaon an kontrol ha Panama Canal tikang ha Panama tungod kay kunuhay ginpapaburan hini an China. Nag-aaringasa liwat hi Trump ha iya plano nga “paliton” o sakupon an Greenland.

Gindeklara liwat ni Trump an iya plano nga “kuhaon an kontrol” ngan “tag-iyahon” an Gaza Strip, ngan paiwason an ngatanan nga Palestino tikang ha ira tuna ngan urukyan. Butaray nga pagtalapas ini ha kalibrihan ngan katungod han mga Palestino ha kalugaringon nga pagdesisyon. Ginsusulsulan ni Trump an Zionista nga estado han Israel nga utro nga igpadayon an panmomba ha Gaza, sukwahi ha kasarabutan han ukoy-bubto.

Diri pala maiha, ginmando ni Trump an 90-kaadlaw nga suspensyon han $64-kabilyon nga mga programa nga ginpopondohan han USAID o US Agency for International Development. Gin-gagamit ni Trump an sugad nga suspensyon agud mas mapugos an mga atrasado nga nasud nga grabe nga nakasarig ha mga USAID nga programa. Kalakip ha gin-gigipit ni Trump amo an mga pankalibsugan nga programa ha South Africa, nga karuyag niya paatrason ha pagkundena ha Israel ha henosidyo nga gerra kontra ha mga Palestino, ngan agud pugngan ini nga magpatuman han reporma ha tuna nga magbubungkag ha kaayusan ha tuna han daan nga rasista nga rehimen.

Ha pagduso ni Trump, gintikangan han US ngan Russia an negosasyon para kunuhay tapuson an gerra ha Ukraine. Natikaklaro na yana nga usa nga “proxy war” ini nga gerra. Ginbabasol yana ni Trump an Ukraine nga “nagpatikang han gerra”, bisan kun ha kamatuoran, maiha nga gin-gamit han US an Ukraine agud makigsumpaki ha Russia. Ha pag-upay han relasyon ni Trump ha Russia ha karukayaknon han Ukraine, ginlalanat niya an bentaha han pagkontrol ha mga mineral nga karikuhan ha rehiyon, sugad liwat, an maghimo hin bara ha relasyon giutan han Russia ngan China, para ha estratehiko nga katuyuanan han US nga ihimulag an China.

Ha ilarum ni Trump, padayon an mga panmilitar nga pwersa han US ha pagpadig-on han dako nga presensya hini ha Asia, partikular na ha palibot han China, ngan ha paggamit ha armado nga pwersa han Pilipinas ngan niyutiyo nga gubyerno nga Marcos, agud dirudiretso nga sulsulan an sumpakiay ha China. Ha kabaraka nga puntiryahon ni Trump an gubyerno han Pilipinas hin pareho nga pan-gigipit ha iba nga nasud, nagdidinagmit yana an rehimen Marcos nga maghinambog ha iya bag-o nga amo para pamatud-an an iya katangkuran ha imperyalismo nga US. Mas ginpahugot pa ni Marcos an kahigot han pan-gawas nga palisiya ngan kaupayan han Pilipinas ha interes ngan heyopulitikal nga adyenda han iya imperyalista nga amo nga US nga palibutan ngan pugngan an dugang nga pagkusog han imperyalista nga China. Hadin naglabay nga mga semana, ginpakusog han gubyerno nga Marcos an pagpaypay han kontra-China nga kalayo, pinaagi han pagdakop ha kunuhay mga “espiya” han China ha Pilipinas (bisan kun libre nga nag-ooperasyon ha Pilipinas an mga ahente han CIA, sugad han binagsak nga pan-espiya nga edro hini ha Maguindanao). Waray hunong liwat an mga pagawas nga “pagtabrog” ha “halimaw” nga barko han Coast Guard han China ha West Philippine Sea (bisan kun mamingaw ini han umagi an higante nga USS Carl Vinson mismo ha teritoryal nga kadagatan han Pilipinas, diin sinakob ini giutan han Leyte ngan Mindanao, antes mag-istasyon ha Palawan).

Ginpapakita han mga pitad han gubyerno nga Trump an desperasyon han imperyalismo nga US nga ig-insister an kalugaringon komo nangunguna nga poder ha bug-os nga kalibutan, ha luyo han estratehiko nga pagluya hini. Gintataglawas niya an interes han mga monopolyo kapitalista nga Amerikano nga naghihingyap nga pahiluagon an lupgop han impluwensya ngan kontrol han US ha mga surok han natural nga karikuhan, mga ruta ha negosyuhay ngan natad han pamumuhunan ha magkalain-lain nga parte han kalibutan. An mga brutal, madarahug ngan mapanhibang nga pitad ni Trump, nagduduso han hiluag nga pag-ato ha iya paghahadi. Yana pala, madagmit nga nagkukusog an kangalas han mga trabahador ngan katawhan Amerikano. Bisan mga korte ngan ahensya han gubyerno natipa ha tiraniya ni Trump. An natikadamo nga mga rali ha magkalain-lain nga parte han US pangilal-an han nabubug-os nga dako nga rabunos han protesta nga piho nga maperdi ha rehimen Trump ha dayuday.

Kinahanglan dagmit liwat nga gumios an katawhan Pilipino agud atuhan an pagin masinugtanon nga niyutiyo han rehimen Marcos, tipahan an panginlabot han US, ngan atuhan an pagdanas ha Pilipinas ha mga sumpakiay nga ginhihimo han US para ha kalugaringon hini nga interes, labina kontra ha karibal hini nga China. Palarabon an diwa han patriyotismo han katawhan Pilipino nga ipasulong an gerra han katawhan agud ipakigbisog an tinuod nga katalwasan han nasud, ngan tapuson an kontrol ngan dominasyon han imperyalismo nga US nga amo an pinakadako nga gamot han pagkukuri ngan pag-antos han katawhan Pilipino.