Tayuyon ang pagsabwag sang terorismo sang 87th IB sa mga banwa sang Samar. Pinakaulihi nga krimen sini ang pagtiro kag pagpatay sang mga berdugo nga soldado sini sa mag-amay nga mangunguma sa Santo Nino, Paranas, Samar sadtong Pebrero 5. Pareho sa iban nga kaso, ginpaguwa nila nga mga Pulang hangaway sang Bagong Hukbong Bayan ang duha agud tabunan ang ila krimen kag salabton sa internasyunal nga makatawo nga laye.

Padulong ang mag-amay nga sanday Renato kag Reymark Gabac sa ila ulumhan sang alas-8 sang aga agud asikasuhon ang ila karabaw sang masugata sang mga soldado. Panaysayon sang mga residente, nasal-an sang mga soldado nga mga Pulang hangaway ang duha sunod sang isa ka inaway sadtong 4:20 sang kaagahon sa malayo nga bahin sa dulunan sang Barangay Santo Niño kag Maylobe.

Bag-o lang nakabalik si Renato sa Samar halin sang pagtiner sang pila ka panahon sa Manila. Naghalin siya sa isla tungod wala siya ginapahuwayan sang pagpamilit sang mga soldado sang 87th IB nga magserbe nga aset-panilag sa ila barangay batuk sa hangaway sang banwa.

“Wala sang huya nila nga ginatikal ang ila kadalag-an bisan nga tuman ka kitaon nga bisan nga sa litrato nga sila mismo ang nagkuha nga binangon lang ang dala sang mag-amay,” pahayag sang BHB-Western Samar. Ginpabayuan pa sang mga soldado kag gin-ilisan ang ginasuksok nga bayo sang mag-amay nga suno sa mga taga-barangay indi amo sini ang ila bayo sang maghalin sa ila balay.

Malayo ang lugar sang mga Gabac sa lugar sang engkwentro, suno sa BHB-Samar. Hungod nga ginpatay ang duha sa kaakig sang mga soldado tungod sa sunod-sunod nila nga kapaslawan sa serye nga pag-atake kag engkwentro sa mga yunit sang BHB sa una nga semana sang Pebrero.

Sa report sang yunit, napaslawan ang isa ka kumpanya sang 82nd DRC nga papason ang isa ka grupo ukon tim sang BHB sa Barangay Calapi, Motiong sadtong Pebrero 1. Suno sa BHB-Western Samar, epektibo nga naka-depensa ang mga Pulang hangaway kon diin isa ka upisyal sang DRC ang napatay samtang luwas nga nakaatras nga wala sang kaswalti ang grupo.

Luwas man nga nakaatras ang yunit sang BHB-Western Samar sa natabo nga engkwentro sadtong Pebrero 5. Sa kainit sang militar, nagpaulan ini sang 17 ka bala sang mortar sa maitum nga katuyuan nga maigo ang BHB.

Indi ini ang una nga higayon nga bayolente nga gin-atake sang 87th IB ang mga banwa sang Samar. Sadtong Septyembre 2023, isa ka semana sini nga ginbomba ang mga barangay sa San Nicolas kag Aguingayan sa San Jose de Buan nga nagtuga sang perwisyo sa taga-baryo. Kadungan sang terorismo ang pagdumili sa mga mangunguma nga magkadto sa ila mga ulumhan. Bisan ang mga eskwelahan napwersa nga magsira tungod diri. Suno sa taga-baryo, mas maayo pa ang kahimtangan nila kon mag-atake ang mga insekto kag ilaga, tungod bisan kon paano may maani sila. Apang kon ang 87th IB ang magsalakay, grabe nga gutom ang ila maagum.

Isa pa ka pagpangbomba ang gin-report sang mga residente sang Sityo San Pedro, Barangay 3, San Jose de Buan, Samar sadtong Hunyo 2024. Balos-salakay ini sang militar pagkatapaos nga mapatyan sang isa ka soldado sa operasyon haras sang BHB-Western Samar.Tungod sa pagpangkanyon kag sa ginpatuman nga pagdumili sang militar, kadam-an sa mga mangunguma wala nakapanguma sa ila kaingin. Ang iban natulod nga magbakwit sa kahadlok nga maigo sang mga bomba. Magluwas sa pagpangkanyon, nagpangawat man sang mga sapat kag pagkaon ang mga soldado halin sa mga mangunguma.

Sa grabe nga gintuga nga perwisyo sang 87th IB, naghugpong ang mga residente sang amo nga sityo agud igiit ang pagpalayas sa mga soldado nga nagakampo sa ila lugar.

Nagpaabot sang pag-ugyon sa kasubo ang BHB-Western Samar sa mga himata sang mag-amay nga Gabac kag iban pa nga biktima sang 87th IB. Pasalig sini nga maabot ang panahon nga pabayaron sang rebolusyonaryong kahublagan ang berdugo nga 87th IB sa ila makasiligni nga krimen batuk sa pumuluyo.