Protesta kontra paghitaas han matrikula ha Panay. Nagprotesta an mga estudyate tikang ha magkalain-lain nga pribado nga unibersidad hadton Pebrero 14 agud tipahan an namamangpangan nga paghitaas han matrikula ngan iba pa nga kabaraydan. An protesta ginpangunahan han Kabataan Partylist-Panay.

Mga protesta kontra taranggalay ha Cebu. Naglansar han piket an mga grupo han trabahador ngan kaapi han Makabayan Coalition hadton Pebrero 13 agud iprotesta an natikagrabe nga taranggalay ngan kontraktwalisasyon ha prubinsya. Antes hini, naghimo hin protesta an mga trabahador han Coca-Cola Cebu ha atubangan han planta hini ha Mandaue hadton Pebrero 10, ha adlaw nga gintanggal han kompaniya an 200 nga trabahador.

Sayaw kontra ha pasismo. Ginpangunahan han Gabriela an kada tuig nga pagsayaw para igselebrar an One Billion Rising (OBR) ha Mendiola ha Manila hadton Pebrero 14. Yana nga tuig, nakapokus an kampanya han OBR ha pag-ato ha pasismo ha magkalain-lain nga parte han kalibutan, kalakip an mga gerra nga ginpangunahan ngan ginsulsulan han US ngan pasismo han mga estado nga ginpondohan han US.

Bugas la an nagmamahal. Kinadto an mga parag-uma nga nagtikang pa ha Bulacan, Rizal, Laguna ngan Tarlac ha atubangan han Department of Agriculture agud utro nga ipanawagan an pagbasura ha Rice Liberalization Law, nga ginsabalaud hadton Pebrero 14, 2018.

Antiqueño kontra-mina. Iginlansar han gatus-gatos nga Antiqueño an koalisyon nga AMLIG Antique Alliance hadton Pebrero 11 agud atuhan an nahibalita nga pagdeklara han estado ha 3,715-kaektarya nga katunaan ha masobra 16 nga barangay ha Patnongon, San Remigio, Valderrama ngan Sibalom ha Antique komo mga lugar han pagmina.

5-katuig nga prangkisa han dyip, ibalik. Nagtirok ha atubangan han LTFRB an mga kaapi han Piston hadton Pebrero 10 agud ig-insister an pagpabalik ha 5-katuig nga indibidwal nga prangkisa ha mga drayber ngan opereytor. Nagsubmiter liwat hira hin petisyon nga mayda pirma han masobra 30 nga organisasyon han mga drayber han dyip para hini.

Tanggalon an buhis ha lana. Nagprotesta an Piston ngan iba pa nga demokratiko nga grupo ha atubangan han Petron Philcoa ha Quezon City hadton Pebrero 10, ika-27 nga anibersaryo han Oil Deregulation Law. Gintugutan hini nga balaud an waray hunong nga paghitaas han presyo han lana. Panawagan nira an pagtanggal ha VAT ngan excise tax ha mga produkto nga petrolyo nga ngaduha pabug-at ha mga drayber ngan komyuter.