Padayon ang pagsabwag og terorismo sa 87th IB sa mga lungsod sa Samar. Ang labing ulahing krimen niini mao ang pagpamusil ug pagpatay sa mag-amahang mag-uuma sa Santo Niño, Paranas, Samar niadtong Pebrero 5. Sama sa ubang mga kaso, gipagawas nilang mga Pulang manggugubat sa Bagong Hukbong Bayan ang duha aron tabunan ang ilang krimen ug ang ilang tulubagon sa internasyunal nga makitawhanong balaod.

Padulong ang mag-amahang Renato at Reymark Gabac sa ilang umahan sa alas-8 sa buntag aron atimanon ang ilang kabaw dihang masugatan sila sa mga sundalo. Sumala sa mga residente, naalaan sa mga sundalo nga mga Pulang manggugubat ang duha human sa usa ka panagsangka niadtong Pebrero 5 sa alas-4:20 sa kaadlawon sa layong bahin sa utlanan sa Barangay Santo Niño ug Barangay Maylobe.

Bag-o lang nakabalik si Renato sa Samar gikan sa pipila ka panahon nga pagpuyo sa Maynila. Mibiya siya sa isla tungod kay gipugos siya sa 87th IB nga mahimong asset-paniktik sa ilang barangay batok sa hukbong bayan.

“Walay kaulaw nga gipasigarbo nila ang ilang kalampusan bisan pa nga klaro kaayo bisan sa litrato nga sila mismo ang mikuha nga sundang ra ang dala sa mag-amahan,” pamahayag sa BHB-Western Samar. Gibistihan pa sa mga sundalo ug giilisan ang sinina sa mag-amahan nga sumala sa mga taga-barangay, dili kadto ang ilang sinina sa pagbiya nila sa ilang balay.

Layo sa nahitaboan sa panagsangka ang lugar sa mga Gabac, sumala sa BHB-Samar. Tinuyo nga gipatay ang duha sa kasuko sa mga sundalo tungod sa sunod-sunod nilang kapakyasan sa serye sa pag-atake ug engkwentro sa mga yunit sa BHB sa unang semana sa Pebrero. Sa taho sa yunit, napakyas ang usa ka kumpanya sa 82nd DRC sa pagpuo sa usa ka grupo o tim sa BHB sa Barangay Calapi, Motiong niadtong Pebrero 1. Sumala sa BHB-Western Samar, epektibong nakapanalipud ang mga Pulang manggugubat diin usa ka upisyal sa DRC ang napatay samtang luwas nga nakaatras nga walay kaswalti ang grupo.

Luwas usab nga nakaatras ang yunit sa BHB-Western Samar sa nahitabong panagsangka niadtong Pebrero 5. Sa kapungot ug kasuko sa militar, nagpabuto kini og 17 ka bala sa mortar sa tinguhang maigo ang yunit sa BHB.

Dili kini ang unang higayon nga gikanyon sa 87th IB ang mga lungsod sa Samar. Niadtong Septyembre 2023, usa ka semana niining gibombahan ang mga barangay sa San Nicolas ug Aguingayan sa San Jose de Buan nga naghatag og kadaot sa mga lumulupyo sa baryo. Dungan sa terorismo ang pagdili sa mga mag-uuma nga moadto sa ilang mga umahan. Bisan ang mga eskwelahan napugos pagsira tungod niini. Sumala sa mga lumulupyo, mas maayo pa ang ilang kahimtang kung moatake ang mga insekto ug ilaga, tungod kay bisan gamay, aduna pa silay maani. Apan kung ang 87th IB ang moatake, grabeng kagutom ang ilang matagamtaman.

Laing pagpamomba ang gitaho sa mga residente sa Sityo San Pedro, Barangay 3, San Jose de Buan, Samar niadtong Hunyo 2024. Kontra-atake kini sa militar human mapatyan og usa ka sundalo sa operasyong haras sa BHB-Western Samar. Tungod sa pagpanganyon ug sa gipahamtang nga pagdili sa militar, kadaghanan sa mga mag-uuma wala na nakaugmad sa ilang kaingin. Ang uban napugos sa pagbakwit sa kahadlok nga maigo sa mga bomba. Gawas sa pagpanganyon, nangawat usab ang mga sundalo og mga hayop ug pagkaon sa mga mag-uuma.

Tungod sa grabeng perwisyong gihatag sa 87th IB, nagkahiusa ang mga residente sa maong sityo aron iduso ang pagpalayas sa mga sundalo nga nagkampo sa ilang lugar.

Nagpaabot og pahasubo ang BHB-Western Samar sa mga pamilya sa mag-amahang Gabac ug uban pang mga biktima sa 87th IB. Gisaad niini nga moabot ang panahon nga pagabayron sa rebolusyonaryong kalihukan ang bangis nga 87th IB sa ilang makalilisang nga krimen batok sa katawhan.