Naglansar hin mga taktikal nga opensiba an mga yunit han Bagong Hukbong Bayan (BHB) ha naglabay nga mga semana kontra ha mga pwersa han militar ngan mapanhibang nga konstruksyon ha Rizal, Mindoro ngan Negros.

Ha Rizal, gin-atake han BHB-Rizal (Narciso Antazo Aramil Command) an tropa han 80th IB hadton Pebrero 17 ha Sityo Tayabasan, Barangay San Jose, Antipolo City, dapit alas-3 han kulop. Usa nga sundalo an napatay.

Maiha na nga nakadto ha lugar an mga tropa han AFP nga nagseserbe nga protektor han mapanhibang nga Wawa-Violago Dam ngan pagkwari nga nagpalayas ha mga parag-uma ngan nagdudurot hin grabe nga destroso ha kalibungan han Rizal.

Ha Negros Oriental, ginhimo han mga Pula nga mangaraway an pagsirot ha mapandambong ngan mapanhibang nga operasyon han kompaniya nga gintatag-iya han dako nga komprador nga pamilya Limkaichong hadton Pebrero 8 ha Barangay Aya, La Libertad. Ginparalisa han yunit an usa nga dump truck, usa nga pison, ngan duha nga backhoe nga gin-gagamit ha paghimo han kalsada para ha mina ngan plantasyon. Gintatantiya nga ₱20 kamilyon an kabug-usan nga danyos han operasyon.

Samtang, pakyas an inatake nga yunit han 4th IB nga lipulon an gin-atake hini nga yunit han BHB ha Sityo Balugo, Barangay Budburan, Mansalay, Oriental Mindoro hadton Pebrero 15. Mabayanihon nga inato an mga Pula nga mangaraway sanglit nahimo nga hibangan an mga berdugo. Duha an patay, kaupod an kumander han platun, ngan siyam an samaran ha ranggo han inatake nga kaaway.

Antes hini, diri mamenos ha upat nga sundalo han 203rd IBde an kaswalti ha duha nga aktibo nga depensa han mga yunit han BHB-Mindoro (Lucio de Guzman Command) ha mga pangatake nga ginhimo han militar ha San Jose, Occidental Mindoro ngan Mansalay, Oriental Mindoro hadton Pebrero 11.