Gibutyag sa Department of Labor and Employment (DOLE) ang pagkamaka-kapitalista niini sa pagpagawas og kautusang “assumption of jurisdiction” o AJ niadtong Pebrero 5, sa ginaatubang nga pakigbisog sa mga mamumuo ug unyon sa Nexperia Philippines Inc. Pinaagi sa AJ, epektibong gipugngan sa DOLE ang planong welga nga giandam sa mga mamumuo nga gipangunahan sa Nexperia Philippines Inc Workers’ Union-National Federation of Labor Unions-Kilusang Mayo Uno (NPIWU-NAFLU-KMU).

Ang AJ usa ka kamanduan nga gipagawas sa kalihim sa DOLE sa mga panagbangi sa trabaho sa mga industriyang giilang “mahinungdanon sa nasudnong interes.” Awtomatikong pugngan niini ang bisan unsang welga o lockout, ug obligahong mobalik dayon sa trabaho ang mga mamumuo ug ipadayon ang operasyon sa kumpanya. Pinaagi sa AJ, mahimong gamiton sa DOLE ang mga pulis ug militar aron sumpuon ang mga mamumuong mosupak niini nga kamandoan.

Sunod-sunod nga mga piket ug rali ang gihimo sa NPIWU niining Pebrero aron batikuson ang AJ. Singgit nila nga diha-diha dayong ibasura ang AJ ug atubangon sa Nexperia ang dugay nang reklamo sa mga mamumuo. Kahinumduman nga mibutar ang kadaghanan sa mga myembro sa NPIWU-NAFLU-KMU niadtong Disyembre 20, 2024 aron ikasa ang welga human sa usa ka tuig nga pagdelatar sa kumpanya sa negosasyon ug deadlock sa negosasyon alang sa bag-ong collective bargaining agreement (CBA). Kini usa usab ka pagbatok sa iligal nga pagpanangtang ug pagsipa sa trabaho sa upat ka upisyal sa unyon lakip na ang presidente niini niadtong Disyembre 17, 2024.

Sumala sa Center for Trade Union and Human Rights (Philippines), lapas ang AJ sa katungod sa mga mamumuo nga makipagnegosasyon alang sa CBA ug katungod nga magwelga. Aduna nay hukum ang International Labour Organization Committee of Experts on the Application of Conventions (ILO CEACR) nga nag-ingon nga lapas ang AJ sa ILO Conventions 87 ug 98 sa katungod sa kolektibong pakig-negosasyon ug katungod magwelga.

Ang Nexperia kabahin sa multinasyunal nga kumpanya nga nagamugna og mga semiconductor chip nga ginagamit sa mga sakyanan, cellphones, ug uban pa. Lakip sa mga kliyente niini ang Bosch, Continental, Denzo, Huawei, Neltz, Tesla, Xiaomi ug Samsung.

Sa kasamtangan, nakahimo ang Nexperia Philippines og pito ka milyong chip matag adlaw. Lakip kini sa kapin 90 bilyon nga semiconductor chip nga namugna matag tuig. Niadtong Pebrero, nagreport ang kumpanya og kinatibuk-ang kita nga $12.61 bilyon para sa 2024.

Ang Nexperia kaniadto mao ang Phillips Semiconductors, usa ka dakung kumpanya nga nakabase sa The Netherlands. Gibaligya kini sa mga Dutch nga tag-iya ngadto sa mga Amerikano nga mamuhunan niadtong 2016 ug nahimong NXP Semiconductors. Niadtong 2017, nabaligya kini ngadto sa WingTech, usa ka kumpanyang Chinese nga adunay bahing kontrol sa estado sa China. Aduna kini mayor nga mga upisina sa The Netherlands ug China.