Gipanghimaraut pag-ayo sa People Surge, usa ka alyansa sa mga nakaluwas sa katalagman, ang pagka-inutil sa rehimeng Marcos nga hatagag proteksyon ang mga bulnerableng komunidad sa panahon sa mga bagyo ug ulan nga dala sa shear line. Gimakmak usab niini ang pagpabor sa rehimen sa magun-ubong mga proyekto ug operasyon sa mina, kwari, ug kumbersyon sa yuta nga nagpagrabe sa mga kadaut sa pagbaha ug pag-ulan. Giduso nila nga kinahanglang hatagan og hustisya ug kumpensasyon ang mga nakaluwas sa mga katalagman ug ihunong ang mga nahisgutang magun-ubong operasyon.

Sukad Enero, daghang barangay sa Samar, Davao, mga rehiyon sa Camarines, Cagayan, ug uban pang mga prubinsya ang nalubog sa baha tungod sa dugay ug kusog nga ulan nga dala sa shear line. Ang shear line mao ang panagbangga sa lainlaing katulin, direksyon, ug temperatura sa hangin nga nagresulta sa pag-ulan.

Bag-ohay lang, gilubog sa mga ulan ang mga barangay sa mga rehiyon sa Calabarzon, Western Visayas, ug Central Visayas nga nakahatag og kadaut sa 850,000 ka mga indibidwal. Lakip sa mga nabalita ang grabeng pagbaha sa Puerto Princesa City ug uban pang mga lungsod sa Palawan, diin lima ang namatay.

Kulang kaayo ang gipanghatag sa estado nga ₱65 milyon nga hinabang kumpara sa kadaku sa kadaut, sumala sa grupo. Dili niini kayang subling tukuron ang mga balay, ibalik ang mga nawalang pananum, o tubagon ang troma nga gibunga niini sa mga komunidad sa ka gamay sa maong kantidad.

Panawagan sa alyansa nga magbaton og kumprehensibong plano sa katalagman aron hatagag prayoridad ang labing bulnerableng mga lugar ug mga programa sa panginabuhian sa mga apektadong mga komunidad. Kinahanglan usab nga papanubagon ang mga upisyal sa lokal ug nasyunal nga napakyas sa panalipdan ang ilang mga lumulupyo, tungod kay ang ilang pagpasagad nagpagrabe sa kadaut sa katalagman.