Mga protesta batok sa pagtaas sa matrikula sa Panay. Nagprotesta ang mga estudyante gikan sa lain-laing pribadong unibersidad niadtong Pebrero 14 aron supakon ang planong pagtaas sa matrikula ug uban pang bayronon. Gipangunahan ang protesta sa Kabataan Partylist-Panay.

Mga Protesta batok sa pagpanangtang sa Cebu. Nagpiket ang mga grupo sa mamumuo ug myembro sa Makabayan Coalition niadtong Pebrero 13 aron iprotesta ang nagkagrabeng pagpanangtang ug kontraktwalisasyon sa prubinsya. Sa wala pa kini, nagpahigayon og protesta ang mga mamumuo sa Coca-Cola Cebu atubangan sa planta niini sa Mandaue niadtong Pebrero 10, sa adlawng gitangtang sa kumpanya ang 200 ka mga mamumuo.

Sayaw batok sa pasismo. Gipasiugdahan sa Gabriela ang tinuig nga pagsayaw aron dumdumon One Billion Rising (OBR) sa Mendiola sa Manila niadtong Pebrero 14. Karong tuiga, nakatutok ang kampanya sa OBR sa pagbatok sa pasismo sa lain-laing bahin sa kalibutan, lakip ang mga gubat nga gipasiugdahan ug gisulsulan sa US ug pasismo sa mga estadong gipundohan sa US.

Bugas lamang ang nagmahal. Nagprotesta ang mga mag-uuma nga gikan pa sa Bulacan, Rizal, Laguna ug Tarlac sa atubangan sa Department of Agriculture aron sa pagpanawagan pag-usab sa pagbasura sa Rice Liberalization Law, nga unang gipatuman niadtong Pebrero 14, 2018.

Antiqueño kontra-mina. Gilunsad sa gatusan ka Antiqueño ang koalisyong AMLIG Antique Alliance niadtong Pebrero 11 aron batukan ang gikatahong pagdeklarar sa estado sa 3,715 ka ektaryang yuta sa 16 ka barangay sa Patnongon, San Remigio, Valderrama ug Sibalom sa Antique isip mga lugar sa mina.

5-ka-tuig nga prangkisa sa dyip, ibalik. Nagtapok atubangan sa LTFRB ang mga myembro sa Piston niadtong Pebrero 10 aron iduso ang pagbalik sa 5-ka-tuig nga indibidwal nga prangkisa sa mga drayber ug opereytor. Nagsumite usab sila og petisyon nga adunay pirma sa kapin sa 30 ka organisasyon sa mga drayber sa dyip alang dinhi.

Tangtangon ang buhis sa lana. Nagprotesta ang Piston ug uban pang demokratikong grupo atubangan sa Petron Philcoa sa Quezon City niadtong Pebrero 10, dungan sa ika-27 nga anibersaryo sa Oil Deregulation Law. Gitugutan niini nga balaod ang walay hunong nga pagtaas sa presyo sa lana. Panawagan nila ang pagtangtang sa VAT ug excise tax sa mga produktong petrolyo nga pabug-at pareho sa mga drayber ug komyuter.