Gidagit ug tinuyong gipatay sa mga sundalo sa 62nd IB ang mag-uuma nga si Rolito Tanillo sa Barangay Tala-on, La Libertad, Negros Oriental niadtong Pebrero 10, alas-7 sa gabii. Matud sa taho, gikuha siya sa mga sundalo gikan sa iyang balay ug gidala sa laing lugar aron patyon.

Gipagawas sa mga sundalo nga napatay siya sa engkwentro sa Bagong Hukbong Bayan (BHB). Paturagas silang nagpabuto aron ingnong adunay engkwentrong nahitabo, nga nagbunga og grabeng kahadlok sa mga residente.

Pipila ka adlaw sa wala pa ang pagpatay, iligal nga nangdakop ang 62nd IB og mga sibilyan niadtong Enero 29 ug 31 sa Central Negros.

Sa Barangay Linantuyan, Guihulngan City, Negros Oriental, gidakop ang 70-anyos nga si Naring Remasog sa dili klarong basehan. Hangtud karon, dili matino sa pamilya kung asa gidala sa mga sundalo ang biktima ug unsa ang iyang kahimtang

Sa Barangay Santol, Binalbagan, Negros Occidental, gidakop si Bobet Carillo niadtong Enero 29. Gipakalot og yuta sa ilalum sa ilang balay ang iyang asawa ug anak aron kuno pangitaon ang armas nga gitago didto ni Carillo. Gawas niini, pugos nga gipagiya si Carillo sa operasyong kombat sa kasikbit nga mga lungsod duul sa Binalbagan.

Niadtong Pebrero 18, gitaho sa mga residente ang pagdagsa sa mga Scout Ranger sa 79th IB sa Hacieda Tres Hermanos sa Barangay Luna, Cadiz City. Gisulod nila ang balay sa lider sa asosasyon ug giinteroga.

Pagpamig-ot. Sa Cordillera, gipasakaan og reklamong paglapas sa “terrorism financing” ang tigpamaba sa Kilusang Mayo Uno- Cordillera nga si Mike Cabangon. Niadtong Pebrero 5, nakadawat siya og usa ka reklamo gikan sa pulis batok kaniya alang kuno sa duha ka insidente nga may kalabutan sa “terrorism financing.”

Si Cabangon ang ika-12 nga progresibong indibidwal sa Northern Luzon nga gipasakaan og hinimo-himong reklamo bahin sa terrorism financing.

Sa Iloilo, gitaho sa Anakbayan-West Visayas State University (WVSU) ang pagkumpronta ngadto usa ka myembro sa Student Intelligence Network (SIN) ilalum sa Reserve Officer Training Corps (ROTC) nga nagpakaaron-ingnonng estudyante sa unibersidad ug naniktik sa ilang organisasyon. Miangkon ang maong indibidwal sa iyang gihimo nga pagpaniktik batok sa mga myembro sa Anakbayan-WVSU sa mando sa ROTC.